Aýyl ákimderiniń saılaýaldy ýádesiniń oryndalýyna monıtorıng júrgizemiz – mınıstrlik
ASTANA. KAZINFORM – Halyq saılanǵan aýyl ákimderiniń saılaýaldy baǵdarlamasynyń oryndalýy barysy baqylaýǵa alynady. Tolyǵyraq Ulttyq ekonomıka vıtse-mınıstri Baýyrjan Omarbekov aıtyp berdi.
«Bıyl saılanǵan ákimderdiń qyzmetine, onyń ishinde olardyń saılaýaldy baǵdarlamalaryn oryndaý, halyqpen eseptik kezdesýler ótkizý, sondaı-aq áleýmettik jelilerde qyzmetti jarııalaý bóliginde monıtorıng júrgizemiz. Jyl qorytyndysy boıynsha tıisti aqparat Prezıdent Ákimshiligine jiberiledi. Sondaı-aq buǵan deıin ótken saılaý júıesin jetildirý qajettigin kórsetti», - dedi Baýyrjan Omarbekov Májilis janyndaǵy qoǵamdyq palata otyrysynda.
Ulttyq ekonomıka mınıstrligi zań jobalaryna kelesi ózgerister men túzetýlerdi ázirledi:
- saılanbaly laýazymdarǵa kandıdattar usyný quqyǵynyń zańnamalyq deńgeıinde talaptardy kúsheıtý;
- bir mezgilde birneshe saılaý okrýgterinde Májilis pen máslıhat depýtattyǵyna kandıdattar usynýǵa tyıym salý. Mundaı tájirıbe Eýropa elderinde bar;
- saılaý zańnamasynyń talaptaryn buzǵany úshin jaýapkershilik máselelerin retteý;
- saılaý naýqandaryn qarjylandyrý máselelerin jetildirý, sondaı-aq ákimderdi saılaý kezinde saılaý rásimderin reglamentteýdiń ózge de máseleleri;
- saılaý ýchaskeleri qurylýy múmkin oryndar tizbesin keńeıtý;
- jergilikti atqarýshy organdardy saılaý naýqany kezeńinde saılaý komıssııalarynyń qyzmetin uıymdastyrýǵa arnalǵan shyǵystardy josparlaý quzyretin berýge baǵyttalǵan.
«Zań jobalaryna retteý saıasatynyń konsýltatıvtik qujaty bıyl 20 qyrkúıekte zań jobalaý qyzmeti máseleleri jónindegi vedomstvoaralyq komıssııanyń otyrysynda maquldandy. Osylaısha, zań jobalary zań jobalaý jumystarynyń 2025 jylǵa arnalǵan josparynyń jobasyna engizilip, qazir múddeli memlekettik organdarmen kelisilip jatyr», - deıdi Baýyrjan Omarbekov.
