Aýyl ákimderiniń korpýsy 100 paıyz jańartyldy – Erlan Qarın

ASTANA. KAZINFORM – Bul týraly Memlekettik keńesshi Erlan Qarın Telegram arnasyndaǵy paraqshasynda jazdy.

– Bes jyl buryn saıası reformalar aıasynda Prezıdent Qasym-Jomart Toqaev aýyl ákimderin tikeleı saılaý mehanızmin engizý týraly bastama kótergen bolatyn. Sonyń nátıjesinde, keıingi jyldary aýyl ákimderiniń korpýsy 100 paıyz jańartyldy. Barlyq 17 oblysta jalpy sany 2 969 ákim saılandy. Olardyń 864-i – ózin-ózi usynǵan úmitkerler, al 283-i – áıelder. Jańa ákimderdiń basym bóligi buryn memlekettik qyzmette jumys istemegenin aıta ketý kerek. Halyq senimine ıe bolǵan azamattardyń qatarynda muǵalimder, dárigerler, sharýalar, kásipkerler, jergilikti kásiporyndar men sharýa qojalyqtarynyń basshylary bar.

Búginde aýyl ákimderiniń ortasha jasy – 44 jas. Saılaý nátıjesinde aýyl ákimderiniń korpýsy jan-jaqty jańartyldy. Memlekettik basqarý júıesin jetildirý úderisi jalǵasyp jatyr. Byltyr barlyq óńirde 45 aýdan ákimin saılaý pılottyq rejımde ótti. Al bıyldan bastap qazirgi aýdan men oblystyq mańyzy bar qala ákimderiniń ókilettikteri aıaqtalýyna qaraı saılaý tikeleı daýys berý arqyly ótkiziledi, - dep jazdy Memlekettik keńesshi.

Erlan Qarın jazbasyn qorytyndylaı kele elimizde saıası reformalardy júzege asyrý úderisi jalǵasyp, memlekettik qyzmet salasynda túbegeıli ózgerister jasalyp jatqanyn atap ótti. 

Eske sala keteıik, buǵan deıin Memlekettik keńesshi súıikti kitaptarynyń tizimin jarııalaǵan bolatyn.