Aýyl ákimderiniń bedeli joq – Májilis depýtaty

ASTANA. KAZINFORM – Májilis depýtaty Anas Baqqojaev aýyl ákimderiniń bedelin, quzyretin kóterý máselesin kóterdi.

«Qazir aýyl ákimderiniń eshqandaı bedeli joq. Aýyl ákiminiń halyqpen kezdesýine eshkim barmaıdy, jınalatyny 10-aq adam. Al aýylda bireý as bersinshi, bári jınalady. Nege? Sebebi ol jerde qyzyq áńgimelesedi, oı bólisip, bir-birin tyńdaıdy. Paıdasy bar, ákimderdiń jınalysynan paıda joq, nege? Ákimderdiń quzyreti de, bedeli de joq. Aýdan ákimderi aýyl ákimderin kúnde shaqyryp alady, kúnde jınalys. Tsıfrlandyrý bar, vıdeokamera bar, sonda da kel dep shaqyryp alady, kedeıdiń keńesi bitpeıdi deıdi. Ákim qashan halyqpen jumys isteıdi?», - dedi Anas Baqqojaev Májilis janyndaǵy qoǵamdyq palata otyrysynda.

Halyq qalaýlysynyń aıtýynsha, turǵyndardyń máselesin sheshýge ákimniń aqshasy joq.

«Sondyqtan da halyq ákimderdiń halyqpen kezdesýine kelmeıdi. Ákimniń nege quzyreti joq degenge kelsek, aıtalyq mal dárigeri syrǵasyz júrgen maldy kórgende qojaıynyna aıyppul salý úshin ınspektordy kútý kerek, qashan osyny toqtatamyz? Ákimder nesıe, ártúrli granttar beremiz dep kepil bere almaıdy. Ákim jazǵan hatpen eshkim sanaspaıdy. Meniń aıtarym, eń aldymen halyqtyń turmys jaǵdaıyn jasap, IV deńgeıdegi bıýdjetti kóterýimiz kerek. Ekinshiden ákimniń quzyretin kúsheıtýimiz kerek. Máslıhatqa tıisip keregi joq, olar jaqsy jumys istep jatyr. Biraq, máslıhattyń da bedelin kóterýimiz qajet», - deıdi ol.

Aıta keteıik, búgin Májilis janyndaǵy qoǵamdyq palatada jergilikti ózin-ózi basqarý máselelerine arnalǵan jıyn ótti.

Sol jerde aýyl ákimderiniń saılaýaldy ýádesiniń oryndalýyna monıtorıng júrgiziletini aıtyldy. 

Sondaı-aq, jergilikti ózin-ózi basqarýdaǵy aýyl bıýdjetiniń kiris kózderin keńeıtý jaǵy qozǵaldy.