Aýǵanstannyń tórt qalasynda jarylys boldy
KABÝL. QazAqparat – Búgin Aýǵanstannyń birneshe qalasynda qatarynan jarylys boldy, dep habarlaıdy «QazAqparat» tilshisi Aamaj News jańalyqtar agenttigine silteme jasap.
Eldiń ishki ister mınıstrligi taratqan málimet boıynsha alǵashqy jarylys Kabýldaǵy besinshi polıtsııa okrýginde bolǵan. Ol jerde eki bala jeńil jaraqattandy.
Ekinshi jarylys Balh provıntsııasynyń ortalyǵy Mazarı-Sharıftegi Seh Dokan meshitinde jamaǵat kúndizgi qulshylyqqa jınalǵan kezde boldy. Keminde 5 adam kóz jumyp, 65 adam jaraqattandy.
Al, Kýndýz qalasynda mına ornatylǵan avtokólik gýmanıtarlyq kómek alý úshin jıylǵan kópshiliktiń ortasynda jaryldy. Aldyn ala berilgen málimette shamamen 30 adam zardap shekkeni aıtylady.
Taǵy bir jarylys Nangarhar provıntsııasynda boldy. Sol mańnan ótip bara jatqan «Talıban» radıkaldy qozǵalysynyń (Qazaqstanda tyıym salynǵan – red.) kóligindegi 4 sodyr qaıtys bolyp, bireýi jaraqat alǵan.
Ázirge Aýǵanstan aýmaǵyndaǵy terrorıstik toptardyń eshqaısysy da jarylystar úshin ózine jaýapkershilik alǵan joq.
Aıta keteıik, osydan eki kún buryn Kabýldyń batys bóligindegi mektepterde bolǵan birneshe jarylystan ondaǵan zardap shekken, ólgenderi de bar.
Buǵan deıin Ierýsalımdegi ýltraońshyldar sherýi Izraıl men Gaza sektorynyń zymyrandy atysyna ákelgeni týraly jazylǵan.
