Aýǵanstannyń syrtqy saıasaty ekonomıkalyq jáne saýda yntymaqtastyǵyna negizdelgen – bıznes-forým

ASTANA. QazAqparat – Aýǵanstan úkimeti halyqaralyq, aımaqtyq jáne jahandyq iskerlik kezdesýlerge, kórmelerge belsendi qatysa bastady. Bul týraly Aýǵanstannyń ónerkásip jáne saýda mınıstri Nýrıddın Azızı aıtty, dep habarlaıdy QazAqparat tilshisi.

«Aýǵanstan halqy men úkimeti aımaqtyq yntymaqtastyqty damytýǵa jáne Aýǵanstannyń múmkindikterin paıdalanýǵa bel býyp, gúldengen jáne ózin-ózi qamtamasyz etetin el bola alady. Bul mindet bizdiń úkimet pen halyqtyń kóp eńbegi men kúsh-jigerin qajet etedi», - dedi Nýrıddın Azızı Astanada ótken bıznes forýmda.

Ol Aýǵanstannyń qysqa ýaqytta saýda, tranzıt jáne ınvestıtsııa sekildi túrli saladaǵy ekijaqty jáne óńirlik ózara is-qımyldarǵa belsendi qatysa alǵanyn atap ótti.

Spıker bul kezdesý ekijaqty saýda, tranzıttik jáne ınvestıtsııalyq kelisimder jasaý, Aýǵanstan, Qazaqstan jáne Reseı Federatsııasy arasynda saýda jáne tranzıt týraly úshjaqty kelisimder jasaý arqyly óńirlik qatynastardyń artýy men damýyna bastama bolaryna úmit bildirdi.

«Osy múmkindikti paıdalanyp, Aýǵanstan ıslam ámirliginiń syrtqy saıasaty aımaqtyq ıntegratsııaǵa, ekonomıkalyq jáne saýda yntymaqtastyǵyna negizdelgen táýelsiz, teńdestirilgen jáne ekonomıkaǵa baǵyttalǵan saıasat ekenin málimdegim keledi. Jáne barlyq Aýǵanstan vedomstvolary osy maqsatqa jetý úshin úzdiksiz eńbek etýge daıyn.Tarıhta Aýǵanstan mádenı jáne kommertsııalyq almasý qaqpasy boldy, al qazir Aýǵanstan úkimeti jeke sektormen tyǵyz yntymaqtastyqta Aýǵanstannyń halyqaralyq, aımaqtyq jáne jahandyq iskerlik kezdesýlerge, kórmelerge qatysý arqyly burynǵydan da mańyzdy ról atqarýyna umtylýda», - dedi aýǵanstandyq mınıstr.

N.Azızı Aýǵanstannyń geoekonomıkalyq jaǵdaıy Aýǵanstan men aımaqtyń ıgiligi úshin tıimdi paıdalanylady dep úmittenedi.

«Áýe dálizin qurý, eki el aýmaǵynda bankterimizdiń ókildikterin ashý, kásipkerler úshin vıza berý pýnktterin qurý, iskerlik kezdesýler, kórmeler men konferentsııalar ótkizý, ortaq keńistik qurý, Qazaqstanǵa júk tasymaldaý merzimderin qysqartý jáne Qazaqstan Respýblıkasynan saýda men tranzıt kedergilerin joıý bul máseleni shyndyqqa jaqyndatady. Bizdiń oıymyzsha, kóptegen eldegi adamdardyń ekonomıkalyq ósýi men ómir súrý sapasyn arttyrýdyń mańyzdy sebebi olardyń ónerkásiptik damýyna baılanysty. Osy sektordyń mańyzdylyǵyn túsine otyryp, Aýǵanstannyń ónerkásip jáne saýda mınıstrligi onyń arttyrýdy óz basymdyǵyna aınaldyrdy», - dedi Nýrıddın Azızı.