Aýǵanstannyń qarýly áskerıleri Ózbekstan aýmaǵyna ótip ketken

TAShKENT. QazAqparat – Aýǵan shekara áskerleriniń qarýly jasaq jaýyngerleri Ózbekstan aýmaǵyna ótti, dep habarlaıdy QazAqparat tilshisi Ózbekstan Syrtqy ister mınıstrligine silteme jasap.

Búgin Ózbekstan Syrtqy ister mınıstrligi Aýǵanstannyń áskerı toptyń shekarany zańsyz kesip ótkeni týraly málimdeme jasady.

«2021 jyldyń 23 maýsymynda Aýǵanstan shekara áskerleriniń 53 áskerı qyzmeteri men jergilikti jasaq jaýyngerleri Shortep ýezi aýmaǵynda Ózbekstan aýmaǵyna ótti. Qajetti anyqtaý rásimderi men tergeý is-áreketteri júrgizilgennen keıin atalǵan aýǵan azamattary keri qaıtaryldy. Ózbekstan aýmaǵyna zańsyz kirýge shekteý qoıylyp, shekarany buzýshylarǵa qatysty qatań sharalar qabyldanady», – delingen habarlamada.

Syrtqy ister mınıstrligi Ózbekstannyń Aýǵanstanmen dástúrli dostyq jáne tatý kórshilik qarym-qatynastaryn qoldaýǵa, beıtaraptyqty saqtaýǵa jáne kórshi eldiń ishki isine aralaspaýǵa shaqyrdy.

«Kórshi eldegi jaǵdaıdyń ýshyǵýy alańdaýshylyq týdyrady. Koronavırýs pandemııasynyń jańa tolqyny jaǵdaıynda shıelenistiń kúsheıýi aýǵan halqynyń ómirin qıyndatady. Janjalǵa tartylǵan barlyq tarapty kúsh qoldanýdan bas tartýǵa jáne beıbit turǵyndarǵa zardap tıgizbeýge shaqyramyz», – delingen Ózbekstan Respýblıkasynyń Syrtqy ister mınıstrliginiń habarlamasynda.