Aýǵanstannyń birinshi vıtse-prezıdenti Reseıden áskerı kómek surady
ÁBÝ-DABI. QazAqparat - Soltústik Aýǵanstanda uzaq ýaqyt boıy áskerı is-qımyldarǵa qatysyp, Kabýlǵa oralǵan Aýǵanstannyń birinshi vıtse-prezıdenti, general Abdýl Rashıd Dýstým Reseıden aýǵan qaýipsizdik kúshterine áýe jáne áskerı tehnıka berýin surady.
Dúısenbi kúni keshke Kabýldaǵy baspasóz konferentsııasynda sóz sóılegen general A.Dýstým «Reseı basshylyǵynyń úndemeı qalmaýy tıis» ekenin málimdedi.
«Bizdiń qaýipsizdik kúshterimiz ushaq, tikushaq jáne basqa da qarýly tehnıkalarǵa muqtaj. Kóp qarýymyz Reseıden ákelingen. Olar (Reseı) bizdiń qaýipsizdik kúshterimizge kómektesýi kerek», - dedi Aýǵanstannyń birinshi vıtse-prezıdenti.
Budan basqa, A.Dýstým «Islam memleketi» uıymy máselesin sóz etip, radıkaldardyń tek Aýǵanstanǵa emes, búkil aımaqqa qaýip tóndirip otyrǵanyn aıtty. Onyń aıtýynsha, Aýǵanstan - IM-niń josparyna kirip otyrǵan jalǵyz el emes. «Eger olardyń josparlaryna tek Aýǵanstan kirse, «Islam memleketiniń» qatarynda ózbekter men sheshender ne istep júr. «Daısh» (IM-niń arabsha ataýy) Kavkaz, Reseı jáne Ortalyq Azııany basyp alýy múmkin. Sırııa men Iraktyń qalaı qırap jatqanyn qarańyz, olar Ortalyq Azııanyń qaýipsizdigin de turaqsyzdandyrǵysy kelip otyr», - dep atap ótti general A.Dýstým.
Aýǵan kúshteriniń eldiń soltústigindegi arnaıy is-qımyldaryn sóz ete otyryp, A.Dýstým áskerlerdiń Farıab jáne Sar-e-Pýl provıntsııalaryn tazartyp úlgerip, endi Kabýldyń atalǵan aýdandarda turaqtylyqty qamtamasyz etip otyratynyn atap ótti.
Buǵan deıin aǵymdaǵy jyldyń tamyz aıynda general Abdýl Rashıd Dýstým soltústiktegi Farıab provıntsııasynda ekstremısterge qarsy arnaıy is-qımyldardy basqarǵan. Aýǵan BAQ-tary AIM-niń birinshi vıtse-prezıdentiniń ómirine eki ret qastandyq jasalyp, «Talıban» toby sodyrlarynyń tosqaýyly uıymdastyrylǵanyn habarlady.
