Aýǵanstannyń Ortalyq Azııamen yntymaqtasý nıeti - tarıhı múmkindik – ózbekstandyq sarapshy
TAShKENT. KAZINFORM – Búgin Ózbekstanda Ortalyq jáne Ońtústik Azııa elderi arasyndaǵy ózara baılanys jónindegi Termez dıalogynyń birinshi otyrysy bastaldy, dep habarlaıdy Kazinform agenttiginiń menshikti tilshisi.
Іs-shara «Beıbitshilik, dostyq pen órkendeýdiń ortaq keńistigin qurý» taqyrybymen ótip jatyr. Termez dıalogyna Ortalyq jáne Ońtústik Azııa, Eýropa, TMD, AQSh pen Taıaý Shyǵys elderinen 200-ge jýyq sarapshy, halyqaralyq jáne óńirlik uıym ókilderi, ǵylymı-zertteý ortalyqtarynyń mamandary qatysyp jatyr.
Atalǵan is-shara barysynda sóz alǵan Ózbekstannyń Strategııalyq jáne óńiraralyq zertteýler ınstıtýtynyń dırektory Eldor Arıpov Ortalyq jáne Ońtústik Azııa arasyndaǵy ekonomıkalyq baılanystardyń nyǵaıyp kele jatqanyn atap ótti.
— Byltyr qos óńir arasyndaǵy taýar aınalymy 5 mlrd dollardan asty. Alaıda, qolda bar áleýet tolyq paıdalanylmaı otyr. Ekonomıkalyq yntymaqtastyqty sapaly ilgeriletý úshin saýda salasyndaǵy kedergilerdi joıyp, kólik dálizderin ártaraptandyrý mańyzdy, — dedi Eldor Arıpov.
Sonymen birge ol Aýǵanstandaǵy jaǵdaıǵa toqtalyp, resmı Kabýldyń syndarly dıalogqa umtylysyn joǵary baǵalady.
— Aýǵanstan ózgeriske bet alyp, óńirdegi beıbitshilik pen turaqtylyqty qamtamasyz etýge umtylyp keledi. Kabýldyń Ortalyq Azııamen tolyq ıntegratsııalanýǵa múddeli bolýy yntymaqtastyqty bekemdeı túsý úshin tarıhı múmkindik sanalady, — dep málim etti Eldor Arıpov.
Eske salaıyq, buǵan deıin Ortalyq jáne Ońtústik Azııa elderi arasyndaǵy Termez dıalogynyń alǵashqy otyrysy Ózbekstanda ótetinin habarlap edik.
Sonymen qatar bıyl Ortalyq Azııa men Eýropa Odaǵynyń Ekonomıkalyq forýmy Ózbekstanda ótedi.