Aýǵanstannyń Ámýdarııany bógeıtin jobasy Qazaqstanǵa qalaı áser etedi – Sý mınıstriniń jaýaby
ASTANA. KAZINFORM — Sý resýrstary jáne ırrıgatsııalar mınıstri Nurjan Nurjigitov: Úkimet otyrysynan keıin ótken baspasóz máslıhatynda Aýǵanstannyń Ámýdarııa ózeniniń boıynda salyp jatqan Kosh-Tepa sý arnasy Qazaqstannyń ırrıgatsııalyq ahýalyna qalaı áser etetini týraly paıymyn aıtty.
— Kosh-Tepa boıynsha ras kóp áńgime júrip jatyr. Bizdiń maqsatymyz — Aral teńizin halyqaralyq qutqarý qory kezinde osy memleketpen (Aýǵanstan) baılanysty ornatý josparymyz bar. Keshe ǵana Ózbekstannyń tıisti mınıstrlikteriniń ókilderimen Tashkentte ókilderi kezdesip, arnaıy konferentsııaǵa qatysqan. Sol jerdegi málimet boıynsha Ózbekstan mamandarynyń Aýǵanstandaǵy sýǵa baılanysty istelip jatqan jumystarǵa konsýltatsııalyq járdemdesý máselesi sheshildi. Ol degen — ózimizdiń arnaıy úılestirý komıssııasy soǵan mindetti túrde qatysady. Komıssııa otyrysynda biz de bul jumystardy talqylaımyz, — dedi Nurjan Nurjigitov.
Sondaı-aq, ol Syrdarııa boıyndaǵy elderdiń bıyl jazda sýdy qalaı bólisetinin aıtty.
— Ámýdarııadan Qazaqstan sý almaıdy. Biz tek Syrdarııadan sý alamyz. Ol Qyrǵyzstannan bastalyp, Tájikstan, Ózbekstan arqyly ótedi de bizge keledi. Syrdarııa ózeni boıynsha osy sýdy retteý úshin bizde arnaıy memleketaralyq úılestirý komıssııasy bar. Onyń múshesi — bes memlekettegi meniń áriptesterim. Jylyna biz tórt ret kezdesemiz. Jaqynda Samarqanda 6 sáýirde kezdesý ótti. Biz vegetatsııa kezinde ár memleketke óziniń tapsyrysyna baılanysty sý kólemi beriletinin bekittik. Bizdiń Qazaqstanǵa Dostyq kanaly boıynsha 909 mln tekshe metr kerek. Tapsyrysymyz boıynsha 100 paıyz qamtamasyz etildi. Odan bólek Soltústik Aral teńizine biz 1 mlrd tekshe metr kóleminde tapsyrys berdik. Ol da 100 paıyz naqtylandy. Vegteatsııa kezinde Shardara sý qoımasyna 700 mlrd tekshe metr sýdy alý máselesi kóterildi. Ol da 100 paıyz bekitildi. Sondyqtan, Syrdarııa ózeni boıynsha bıylǵy vegetatsııa kezinde sý qoımalarynda jınaqtalǵan sý mólsheri 100 paıyz kóleminde jetedi dep otyrmyz, — dedi mınıstr.
Eske salsaq, Kazinform oqyrman nazaryna atalǵan jobanyń Ortalyq Azııadaǵy sý tapshylyǵyna qalaı áser etetini týraly saraptama usynǵan edi.