Aýǵanstannyń alty provıntsııasynda ınternet shekteldi

ASTANA. KAZINFORM — Aýǵanstanda ınternetti óshirý sharasy jańa aımaqtardy qamtydy. Beısenbi kúni bılik eldiń shyǵys jáne soltústik bóligindegi taǵy bes provıntsııada ınternetke qoljetimdilikti shektegenin habarlady, dep jazady ABC News.

Jańa shekteý Baglan, Badahshan, Kýndýz, Nangarhar jáne Tahar provıntsııalaryna engizildi.

Al seısenbi kúni bul sheshim Balh provıntsııasynda kúshine engen bolatyn.

Aýǵan bıliginiń málimdeýinshe, optıkalyq ınternet «ádepsizdiktiń aldyn alý maqsatynda» «Talıban» qozǵalysynyń jetekshisi Haıbatýlla Ahýnzada qabyldaǵan sheshim negizinde toqtatyldy.

«Bul shara ádepsizdiktiń aldyn alý úshin qabyldandy, halyqtyń qajettiligin óteýge balama júıe qurylady», — dedi úkimet ókili jýrnalısterge.

Aýǵanstandaǵy BAQ-ty qoldaý uıymy bul sheshimdi aıyptap, alańdaýshylyq bildirdi.

«Talıban basshysynyń buıryǵymen jasalǵan bul áreket mıllıondaǵan azamattyń erkin aqparat pen negizgi qyzmetterge qol jetkizýin shektep qana qoımaı, pikir bildirý bostandyǵyna jáne BAQ jumysyna eleýli qaýip tóndiredi», — delingen uıymnyń málimdemesinde.

Qazirgi tańda alty provıntsııada tek mobıldi jeli jumys istep tur.

Alaıda jergilikti turǵyndar mundaı ınternettiń baıaý ári qymbat ekenin aıtýda.

Eske sala keteıik, buǵan deıin Aýǵanstanda úılený toıyndaǵy birqatar rásimge tyıym salynǵan bolatyn.