Aýǵanstannan taýar tasymaldaıtyn qazaq-ózbek birlesken temirjol kásiporny qurylady

ASTANA. KAZINFORM – Syrtqy ister mınıstriniń orynbasary Álibek Qýantyrov Qazaqstan-Ózbek iskerlik keńesiniń jıynynda baýyrlas elderdiń arasyndaǵy kólik-logıstıkalyq áriptestiktiń basym baǵyttaryn atady.

«Qazaqstannyń kólik-logıstıkalyq áleýetin arttyrýdyń 2030 jylǵa deıingi tujyrymdamasynda 5 transshekaralyq hab qurý kózdelgen. Bul habtar ınvestıtsııa tartýdyń negizgi ortalyǵyna aınalyp, kórshi elderge jóneltiletin shıkizat emes taýarlardyń eksportyn 35 paıyz arttyrýǵa múmkindik beredi. Biz óńirdegi kólik logıstıkasynyń áleýetin arttyrýǵa jáne kólik dálizderin jańǵyrtyp, jańa marshrýttar ashýǵa múddelimiz. Buǵan Belarýs-Reseı-Qazaqstan-Ózbekstan-Aýǵanstan-Pákistan halyqaralyq kólik dálizin qurý týraly memorandýmǵa qol qoıǵanymyz dálel bola alady. Bul dáliz Eýroodaq pen Reseıdi Ortalyq Azııa elderimen baılanystyryp jatqan Orta Azııa dálizi arqyly ótedi dep kózdelgen. Darbaza-Maqtaaral temirjol jelisin salý jobasynyń iske qosylǵanyn eskersek, onyń Qazaqstandaǵy bóligi Orta Azııa dáliziniń qajetine jaraı alady», - dedi ol.

Sondaı-aq, ol temirjol salasynda birlesken kásiporyn qurý ne úshin qajet ekenin aıtty.

«Qazaqstan men Ózbekstannyń temirjol ákimshilikteriniń arasynda birlesken kásiporyn qurý jobasy eki aradaǵy yqpaldastyqty nyǵaıta túsetinin aıtý kerek. Bul joba ekijaqty saýda-sattyqty arttyryp, taýar tasymalyn ulǵaıtady. Sonymen qatar, bul birlesken kásiporyn transaýǵan marshrýtyn damytýǵa tartylady. Bul eki eldiń de ekonomıkasynda jaǵymdy áser etedi», - dedi Álibek Qýantyrov.