Aýǵanstannan Ózbekstanǵa dronmen esirtki ótkizbek bolǵandardyń áreketi áshkerelendi
TAShKENT. KAZINFORM – Aýǵanstan azamattary dronnyń kómegimen Ámýdarııa ózeni arqyly Ózbekstan aýmaǵyna esirtki tasymaldamaq bolǵan, dep habarlaıdy Kazinform agenttiginiń Tashkenttegi menshikti tilshisi.
Ózbekstannyń Memlekettik qaýipsizdik qyzmetinen málim etkendeı, shekara jáne ishki ister organdarynyń qyzmetkerleri bul árekettiń jolyn kesti. Nátıjesinde dronǵa bekitilgen salmaǵy 2 keliden astam apıyn tárkilendi.
Qazirgi ýaqytta atalǵan derek boıynsha qylmystyq is qozǵalyp, tergeý júrgizilip jatyr.
Eske salsaq, bıyl eki aıda Ózbekstanda 8 esirtki zerthanasy anyqtaldy.
Byltyr ózbekstandyq kedenshiler 2,8 tonnadan astam esirtki men psıhotroptyq zattardy tárkiledi.
Sondaı-aq, keıingi bes jylda Ózbekstanda tárkilengen sıntetıkalyq esirtki kólemi 80 ese ósken.
Buǵan deıin jazǵanymyzdaı, Ortalyq Azııa elderi arqyly jylyna 90 tonnaǵa jýyq geroın ótedi.
