Aýǵanstannan áskerlerdi shyǵarýdyń 25 jyldyǵyna oraı jıyn ótti - Astana
ASTANA. QazAqparat - Surapyl soǵystyń sýyǵyna tońyp, jalynyna sharpylǵan ardagerlerdiń azamattyq ustanymdary quqyq qorǵaý salasynda qyzmet etip jatqan jas býynmen qatar, óskeleń urpaqqa ónege bolýy tıis.
Osyndaı maqsatpen elordalyq ІІD búgin Keńes áskeriniń Aýǵanstannan shyǵarylýyna 25 jyl tolýyna oraı, óz ardagerlerine iltıpat bildirdi. Qazirgi tańda elordalyq Іshki ister departamentinde Aýǵanstan Respýblıkasynda ınternatsıonaldy boryshtaryn ótegen 16 ardager jáne 4 qyzmetker bar. Qaharly soǵystyń qatigez kúnderin basstan ótkizgen ardagerler óz eńbekterin ishki ister organdarynda jalǵastyrýda.
Jıyn barysynda «Quqyq tártibin qamtamasyz etýge qosqan úlesi úshin» tósbelgisimen ІІD Kınologııalyq qyzmet ortalyǵynyń kezekshi ınspektory polıtsııa maıory Erbolat Serikbaev, QR ІІM Gramotasymen jol-patrýldik polıtsııa qyzmetiniń qyzmet ınspektory polıtsııa maıory Janat Serikbaev marapattaldy. Sonymen qatar, QR ІІM Alǵys haty ІІD Jedel basqarý ortalyǵynyń ınspektory polıtsııa maıory Saparǵazy Baıǵalıevke tabystaldy.
Almaty aýdandyq ІІB bastyǵy polıtsııa polkovnıgi Marat Tólebaev atap ketkendeı: «Erlik pen patrıottylyqtyń dástúri - qoǵamnyń jarqyn damýynyń mańyzdy faktory. Sol qaǵıdadan taımaǵan Uly Otan jáne Aýǵan soǵysy ardagerleri jas urpaqtyń boıyna otansúıgishtik pen qaırattylyqty qalyptastyrýda úlgi bolyp tabylady».
Jıyn sońy kontsertke ulasyp, patrıottyq ánder shyrqaldy, dep habarlady Astana qalalyq ІІD baspasóz qyzmetinen.
