Aýǵanstanmen shekarada bolǵan qarýly qaqtyǵysta eki tájikstandyq shekarashy qaza tapty

ASTANA. KAZINFORM – 24 jeltoqsanda tájik-aýǵan shekarasynda bolǵan qarýly qaqtyǵysta Tájikstannyń Ulttyq qaýipsizdik memlekettik komıtetiniń (UQMK) shekara áskerleriniń eki áskerı qyzmetshisi qaza tapty, dep habarlady «Hovar» aqparat agenttigi. 

TR UQMK ShÁ baspasóz ortalyǵynyń málimetinshe, 2025 jyldyń 23 jeltoqsanynda saǵat 23:30-da Hatlon oblysynyń Shamsıddın Shohın aýdanyndaǵy «Sarchashma» shekara jasaǵy №5 shekara beketiniń kúzet aımaǵynda lańkestik uıymnyń úsh múshesi Aýǵanstannan Tájikstan aýmaǵyna memlekettik shekarany buzyp ótken.

Ýaqytyly júrgizilgen jedel-izdestirý sharalarynyń nátıjesinde 24 jeltoqsan kúni saǵat 11:15-te lańkesterdiń ornalasqan jeri anyqtaldy. Olar tájik shekarashylarynyń berilý týraly buıryǵyna baǵynbaı, qarýly qarsylyq kórsetken jáne shekara beketteriniń birine qarýly shabýyl jasamaq bolǵan.

Áskerı operatsııa nátıjesinde úsh lańkes zalalsyzdandyryldy. Oqıǵa ornynda úsh M-16 myltyǵy, Kalashnıkov avtomaty, dybys tunshyqtyrǵyshy bar úsh sheteldik tapansha, 10 granata, túnde kóretin qurylǵy, jarylǵysh zattar jáne basqa da oq-dáriler tárkilendi.

- Ókinishke qaraı, qarýly qaqtyǵys jáne osy lańkestik shabýyldyń aldyn alý kezinde Tájikstan Respýblıkasy Ulttyq qaýipsizdik memlekettik komıteti Shekara áskerleriniń eki áskerı qyzmetshisi qaza tapty. Olar Navrýzbekov Zırehbon Nagzıbekovıch jáne Kýrbanov Ismatýllo Gýlomovıch, - dep habarlady baspasóz qyzmeti.
Vedomstvo bul sońǵy bir aıda Aýǵanstan men Tájikstan arasyndaǵy úshinshi qarýly shabýyl, lańkestik akt jáne shekaradan ótý oqıǵasy ekenin, onyń saldarynan beıbit turǵyndar men áskerı qyzmetkerler qaza tapqanyn qosyp ótti.

Buǵan deıin Tájikstannyń ońtústiginde Aýǵanstan aýmaǵynan jasalǵan qarýly shabýyl saldarynan Qytaıdyń úsh azamaty qaza tapqanyn jazdyq.