Aýǵanstanǵa jiberiletin qazaqstandyq 4 ofıtserge aýǵan úkimeti men halqyn beıbit ómirge daıarlaý mindeti júkteledi- E. Qazyhanov
ASTANA. 27 mamyr. QazAqparat /Qanat Mámetqazyuly/ - Aýǵanstanǵa jiberiletin qazaqstandyq 4 ofıtserge sol eldiń úkimeti men halqyn beıbit ómirge daıarlaý mindeti júkteledi.
Búgin QR Cyrtqy ister mınıstrliginde ótken QR Parlamenti Májilisi Halyqaralyq ister, qorǵanys jáne qaýipsizdik komıtetiniń kóshpeli otyrysy barysynda syrtqy saıasat vedomstvosynyń basshysy Erjan Qazyhanov osylaı málimdedi.
Sóz arasynda mınıstr qoǵamda úlken rezonans týdyrǵan aýǵan máselesine de toqtalyp ótti. Esterińizge sala keteıik, Parlament Májilisi buǵan deıin qazaqstandyq áskerı qyzmetshilerdiń Aýǵanstandaǵy qaýipsizdikke járdemdesýdiń halyqaralyq kúshteri shtaby jumysyna qatysýyn qamtıtyn qujatty maquldaǵan bolatyn.
«Bul rette toqtala ketetin jaıt, BUU qararyna sáıkes, bundaǵy negizgi áńgime Kabýlǵa tórt qazaqstandyq ofıtserdi jiberý týraly bolyp otyr. Sonymen qatar, ondaǵy bizdiń ofıtserlerge júktelgen negizgi mindet Aýǵanstan úkimeti men halqyn beıbitshilikke, tynysh ómirge daıarlaýǵa járdemdesý bolyp tabylady. Sondaı-aq, bizdiń áreketimiz BUU Qaýipsizdik keńesiniń mandatyn qatań saqtaý sheńberinde júzege asyp otyrǵanyn da atap ótkim keledi», - dedi mınıstr.
