Aýǵanstanǵa jedel kómek: Qazaqstan dárigerleri apat aımaǵyna bardy
ASTANA. KAZINFORM — Joıqyn jer silkinisinen keıin Qazaqstan Aýǵan halqyna gýmanıtarlyq mıssııa jiberdi, dep habarlaıdy Syrtqy ister mınıstrliginiń baspasóz qyzmeti.
Aýǵan halqyna sońǵy joıqyn jer silkinisterinen keıin qoldaý kórsetý maqsatynda Qazaqstan Respýblıkasy Aýǵanstanǵa quramynda 13 dárigeri bar (hırýrgter, neırohırýrgter, travmatologtar jáne t. b.) gýmanıtarlyq mıssııany joldady.
Sonymen qatar Aýǵanstanǵa 18 tonna dári-dármek, medıtsınalyq qural-jabdyqtar, shatyrlar jáne alǵashqy qajettiliktegi ózge de zattar túrinde gýmanıtarlyq kómek kórsetildi.
— Qabyl qalasyna barǵan medıtsınalyq mıssııa men gýmanıtarlyq júkti Qazaqstannyń Aýǵanstandaǵy Ýaqytsha senimdi ókili Ǵazız Aqbasov, sondaı-aq Aýǵanstan Densaýlyq saqtaý mınıstrligi men Tabıǵı apattarǵa qarsy kúres jónindegi ulttyq agenttiginiń basshylyq ókilderi qarsy aldy. Qazaqstandyq medıtsınalyq brıgada aýǵan áriptesterimen birge shuǵyl medıtsınalyq kómekke muqtaj jandarǵa jedel járdem kórsetedi jáne konsýltatsııalyq qoldaý júrgizedi, — delingen habarlamada.
Gýmanıtarlyq kómek Aýǵanstandaǵy QR Elshiliginiń, QR Tótenshe jaǵdaılar, Densaýlyq saqtaý jáne Qorǵanys mınıstrlikteriniń, sondaı-aq «KazAID» halyqaralyq damý agenttiginiń qoldaýymen júzege asyryldy.
Bul mıssııa Qazaqstannyń qıyn kezeńde aýǵan halqymen yntymaq qaǵıdattaryna berik ustanymyn kórsetedi.
Eske salsaq, tabıǵı apattan zardap shekken Aýǵanstanǵa Qazaqstan dárigerleri men dári-dármek jibergenin jazǵanbyz.