Aýǵanstanǵa ósimdik maıyn eksporttaý kólemi artyp keledi - AShM

ASTANA. KAZINFORM — QR Aýyl sharýshylyǵy mınıstrligi ósimdik maıynyń eksportyna qatysty túsinik berdi.

- Ósimdik maıy eksportynyń negizgi kólemi Qytaıǵa (42,4%), Ózbekstanǵa (35,4%), Tájikstanǵa (12,7%), Aýǵanstanǵa (3,2%), Qyrǵyzstanǵa (1,4%), Latvııa men Túrikmenstanǵa (1,8%) shyǵarylady. 2024-2025 marketıngtik jyly Aýǵanstan baǵytyna maı jáne toń maı ónimderiniń eksporty kólemi 32,7 myń tonnaǵa jetip, aldyńǵy maýsymmen salystyrǵanda 69 paıyzǵa artty, - delingen mınıstrliktiń Kazinform agenttigine bergen jaýabynda.

Sonymen qatar, Shymkent qalasynda ótken Qazaqstan-Aýǵanstan bıznes-forýmy aıasynda QR Premer-mınıstriniń orynbasary Serik Jumanǵarınniń qatysýymen atalǵan el kompanııalary men «Maıly daqyldardy qaıta óńdeýshilerdiń ulttyq qaýymdastyǵy» arasynda jalpy quny 24 mln AQSh dollary bolatyn yntymaqtastyq týraly memorandýmǵa qol qoıyldy.

- 2023 jylmen salystyrǵanda 2024 jyly ósimdik maıynyń eksporty 30 paıyzǵa ósti, ıaǵnı 451 myń tonnadan 582 myń tonnaǵa deıin jetti. Onyń ishinde kúnbaǵys maıy 30,7 paıyzǵa (364 myń tonnadan 476 myń tonnaǵa deıin), raps maıy 38,5 paıyzǵa (46,2 myń tonnadan 64 myń tonnaǵa deıin) artty, - dep atalyp ótken vedomstvo aqparatynda.

Buǵan deıin habarlanǵandaı, osy jyldyń 9 aıynda byltyrǵy osy kezeńmen salystyrǵanda ósimdik maıynyń óndirisi 23,3 paıyzǵa ósti (519,4 myń tonnadan 640,5 myń tonnaǵa deıin), onyń ishinde kúnbaǵys maıy 26,7 paıyzǵa (443,5 myń tonnadan 562,1 myń tonnaǵa deıin), raps maıy 14,3 paıyzǵa (34,1 myń tonnadan 38,9 myń tonnaǵa deıin).