Aýǵanstanǵa kómek: Arnaıy reıs Shymkentten Gerat aımaǵyna ushyp shyqty
Aýǵanstannyń batysynda bolǵan jer silkinisinen zardap shekkenderge Qazaqstan halqynyń atynan gýmanıtarlyq kómek alyp baratyn arnaıy reıs Shymkent qalasynan Gerat provıntsııasyna attandy, dep habarlaıdy Kazinform agenttigi.
Ulttyq ulannyń gýmanıtarlyq kómek tıegen Y8F200W ushaǵy Shymkent áýejaıynan ushyp shyqty.
Arnaıy bortqa 1200 adamǵa ýaqytsha baspana bolatyn ondaǵan shatyr, birneshe tonna dári-dármek tıelgen.
Gýmanıtarlyq bortty dıplomatııalyq jaǵynan súıemeldeýshi retinde bekitilgen Syrtqy ister mınıstrliginiń janyndaǵy Qazaqstan halyqaralyq resmı damý agenttiginiń bas menedjeri Serik Nurjannyń aıtýynsha, Gerat provıntsııasynda tabystalatyn dári-dármektiń tizimi Aýǵanstan taraby suratqan tizbe boıynsha jasaqtalǵan. Atap aıtqanda, azıtromıtsın, ıbýprofen, tseftazıdım, paratsetamol sııaqty ystyq túsiretin, qabynýǵa qarsy preparattar men antıbıotıkter jetkiziledi.
Buǵan deıin Ulttyq ulannyń arnaıy bortyna 16 tonna gýmanıtarlyq júk tıelip Aýǵanstanǵa ushýǵa daıyn turǵanyn habarlaǵanbyz.
Eske salsaq, 7 qazan kúni Aýǵanstannyń batysyndaǵy Gerat provıntsııasyndaǵy 6,3 baldyq jer silkinisi saldarynan 2053 adam qaza taýyp, 9 myńnan astam adam jaraqat alǵan.
Buǵan deıin Qazaqstannyń Aýǵanstanǵa gýmanıtarlyq kómek kórsetetini habarlanǵan edi.
Gýmanıtarlyq kómek azyq-túlik taýarlary, shatyr, dári-dármek, kıim-keshek jáne basqa da qajetti zattardan turady.
Júktiń bir bóligi áýe jetkizilse, bir bóligi temirjol kóligimen jóneltiledi.
Sonymen qatar Aýǵanstanǵa úıindi astynda qalǵan adamdardy qutqarý úshin TJM qutqarýshylary, sonyń ishinde kınolog mamandar jiberiledi.
Syrtqy ister mınıstrliginiń resmı ókili Aıbek Smadııarovtyń aıtýynsha, Aýǵanstandaǵy jer silkinisinen Qazaqstan azamattary zardap shekken joq.
