«Aýǵanstanǵa Qazaqstan Qarýly Kúshteriniń kontıngenti jiberiledi» degen áńgime beker - QR SІM
ASTANA. 23 mamyr. QazAqparat /Aıdar Ospanalıev/ - Qazaqstan men NATO arasyndaǵy kelisim Aýǵanstandaǵy halyqaralyq kúshterdiń Kabýlda ornalasqan shtabyna 4 qazaqstandyq ofıtserdi jiberýdi qarastyrady.
Sondyqtan Aýǵanstanǵa Qazaqstan Qarýly Kúshteriniń kontıngenti jiberiledi degen áńgime artyq aıtylǵan sóz. Bul týraly búgin Astanadaǵy aptalyq brıfıngte QR Syrtqy ister mınıstrliginiń resmı ókili Asqar Ábdirahmanov málim etti.
Onyń sózine qaraǵanda, bul aýǵan halqynyń ózi tańdaǵan jáne BUU moıyndaǵan Aýǵanstan úkimeti men Parlamentine qaýipsizdikti qamtamasyz etý jáne beıbit ómirdi qalpyna keltirý boıynsha halyqaralyq qoldaý sharalaryna atsalysý bolyp tabylady. «Jalpy Aýǵanstandaǵy halyqaralyq koalıtsııaǵa búginde 47 memleket qatysýda. Onyń 19-y NATO-ǵa múshe emes memleketter. Al 6-aýy Islam konferentsııasy uıymyna kiredi»,-dedi resmı ókil.
Onyń aıtýynsha, elimizden Aýǵanstanǵa attanatyn 4 mamannyń 2-eýi áskerı sarapshylar, 1-eýi dáriger, 1-eýi tyl uıymdastyrýshysy.
