Aýǵanstanǵa gýmanıtarlyq kómek: Arnaıy bort Shymkentten ushyp shyǵýǵa ázir
Aýǵanstanǵa jol tartqan gýmanıtarlyq kómektiń bir bóligi áýemen jetkiziletinin buǵan deıin jazǵanbyz. Sol reıs Astana men Almatydan kerekti jabdyqtar men dári-dármekti alyp, Shymkentke kelip qondy, dep habarlaıdy Kazinform tilshisi Esimjan Naqtybaı.
Shymkent qalasynda da Ulttyq ulan enshisindegi Y8F200W ushaǵyna dári-dármek tıelip, bort erteńgi saparǵa daıyn kúıge keltirildi. Syrtqy ister mınıstrliginiń janyndaǵy "Qazaqstan halyqaralyq resmı damý agenttigi" kommertsııalyq emes aktsıonerlik qoǵamy gýmanıtarlyq bortty dıplomatııalyq jaǵynan súıemeldeýshi retinde bekitilgen.
Aktsıonerlik qoǵamnyń bas menedjeri Serik Nurjannyń aıtýynsha, Gerat provıntsııasynda tabystalatyn dári-dármektiń tizimi Aýǵanstan taraby suratqan tizbe boıynsha jasaqtalǵan. Atap aıtqanda, azıtromıtsın, ıbýprofen, tseftazıdım, paratsetamol sııaqty ystyq túsiretin, qabynýǵa qarsy preparattar men antıbıotıkter jetkiziledi. Budan bólek, baspanasyz qalǵan halyqqa pana retinde tótenshe jaǵdaı kezinde paıdalanylatyn arnaıy shatyrlar taratylady.
Bort komandıri Qurmanǵalı Topanov osymen úshinshi ret gýmanıtarlyq kómek tasýǵa shyǵyp turǵanyn aıtady.
"Ulttyq ulannyń arnaıy bortyna 16 tonna gýmanıtarlyq júk tıeldi. Buǵan deıin aqpan aıynda Túrkııa men Sırııa memleketterine gýmanıtarlyq kómek aparýǵa qatysqanmyn. Gýmanıtarlyq sapardyń ózge arnaıy saparlardan aıyrmashylyǵy – gýmanıtarlyq júktiń tutas, búlinbeı jetýine búkil komanda bolyp jaýap beremiz", – deıdi Ulttyq ulan áskerı bóliminiń avıatsııalyq jasaq komandıri.
Eske salsaq, 7 qazan kúni Aýǵanstannyń batysyndaǵy Gerat provıntsııasynda 6,3 baldyq jer silkinisi saldarynan 2053 adam qaza taýyp, 9 myńnan astam adam jaraqat aldy.
Buǵan deıin Qazaqstannyń Aýǵanstanǵa gýmanıtarlyq kómek kórsetetini habarlanǵan edi. Júktiń bir bóligi áýemen jetkizilse, bir bóligi temirjol kóligimen jóneltiledi. Sonymen qatar Aýǵanstanǵa úıindi astynda qalǵan adamdardy qutqarý úshin TJM qutqarýshylary, sonyń ishinde kınolog mamandar jiberiledi.
Syrtqy ister mınıstrliginiń resmı ókili Aıbek Smadııarovtyń aıtýynsha, atalǵan eldegi zilzaladan Qazaqstan azamattary zardap shekken joq.
Buǵan deıin arnaıy bort búgin Almatydan Shymkentke ushyp shyqqanyn jazǵan bolatynbyz.
