Aýǵanstandyq bosqyn áıelderdiń ómirine qaýip tónip tur

ASTANA. KAZINFORM - Pákistan bıliginiń sheteldik bosqyndardy tolyqtaı deportatsııalaý úshin belgilegen merziminiń bitýine nebári 4 kún qaldy. Bılik 31 naýryzǵa deıin qujatsyz júrgen barlyq sheteldikti elden shyǵarýdy josparlap otyr. Olardyń basym kópshiligi - Aýǵanstan azamattary.

женщины Афганистана
Фото: Анадолы

Euronews málimetinshe, Talıban bıligi ornaǵan 2021 jyldan beri jarty mıllıonnan astam aýǵanstandyq Pákistanǵa bas saýǵalap barǵan. Olardiń kóbi AQSh pen ózge memleketterge qonys aýdarýdy kútip otyr. Alaıda Tramp ákimshiligi 27 qańtardan bastap AQSh-tyń bosqyndardy qabyldaý baǵdarlamasy keminde úsh aıǵa toqtatylatynyn málimdedi. Sóıtip 20 myń aýǵan Pákistanda qalyp qoıdy. Endi olar 31 naýryzǵa deıin elden ketpese, Aýǵanstanǵa deportatsııalanýy múmkin. Halyqaralyq kóshi-qon uıymynyń (IOM) derekterine súıensek, 2023 jyldan beri 800 myńnan astam aýǵan azamaty óz erikterimen nemese májbúrli túrde elderine oralǵan. Olardyń 70%-y - áıel men bala.

Osyǵan baılanysty Human Rights Watch (HRW) uıymy Islamabadty aýǵan bosqyndaryna kórsetilip otyrǵan qysymdy toqtatýǵa shaqyrdy.

- Pákistan bıligi aýǵan azamattaryn elderine oralýǵa májbúrleýdi dereý toqtatýy kerek jáne deportatsııalaný qaýpinde turǵandarǵa ózderine qorǵanys izdeý múmkindigin berýi tıis. Aýǵanstan májbúrlep qaıtarylǵan eshbir bosqynnyń eline oralýy úshin qaýipsiz emes, - deıdi HRW-dyń Azııa boıynsha dırektory Eleın Pırson.

Aýǵanstanǵa qaıtarylatyn bosqyndardyń arasynda elinen qashyp shyqqan 60 quqyq qorǵaýshy áıel bar. Olar eline oralǵan jaǵdaıda ómirimizge qaýip tónedi dep alańdaıdy. Osydan 3 kún buryn AQSh-tyń Change.org  onlaın platformasynda «60 aýǵan áıelin deportatsııadan jáne ólim jazasynan qutqarý» atty petıtsııa jarııalanǵan.

- Bul áıelder qorǵaýǵa muqtaj, óıtkeni olardyń úshten ekisi buryn «Talıban» tarapynan tutqyndalyp, azaptalǵan nemese zorlanǵan. Olar únemi qaýip-qaterde ómir súredi. Osy aptada ǵana polıtsııa aýǵan bosqyndary turyp jatqan úılerge tintý júrgizdi, – delingen petıtsııa sıpattamasynda.

Eske sala keteıik, Aýǵanstanda tálipter áıelderge radıodan habar taratýǵa tyıym salǵanyn jazǵan edik.

 

Сейчас читают