Aýǵanstandaǵy sý tasqyny saldarynan 73 adam kóz jumdy
ASTANA. QazAqparat - Soltústik aýǵandyq Baghlan provıntsııasy kútpegen jerden tap bolǵan sý tasqynynyń saldarynan keminde 73 adam mert boldy. Tabıǵat apaty myńdaǵan adamnyń óz úılerin tastap shyǵýyna májbúrledi, dep habarlady VVS-tyń Orys qyzmeti.
Ókimet oryndarynyń málimetteri boıynsha, Pýlı-Hýmrı provıntsııasynyń astanasynan soltústikke qaraı 140 shaqyrym jerdegi Gýzarga-ı-Nýr okrýginde naǵyz joıqyn apat pen qurbandar kóp bolǵan.
Polıtsııanyń málimdeýinshe, qaza bolǵandardyń arasynda áıelder men balalar da bar. 200-ge jýyq adam habar-osharsyz ketkender qatarynda.
Tabıǵattyń tosyn minezi saldarynan 2 myńnan astam úı búlingen, kóptegen joldardy sý shaıyp ketip, olarda qozǵalys toqtaǵan.
Sońǵy aptada Aýǵanstannyń soltústiginde nóser jańbyr jaýdy, sonyń saldarynan sý tasqyny men jynystardyń yǵysýy paıda boldy.
Baghlan provıntsııasy polıtsııasynyń bastyǵy Amınýlla Amarhel Bı-Bı-Sı-ge sý tasqynynan ásirese Gýzarga-ı-Nýr ýeziniń tórt aýyly kóbirek zardap shegip, joldar men kópirler búlingenin málimdedi.
Gýzarga-ı-Nýr ýeziniń bıligi Kabýlge, úkimetke shuǵyl kómek berýge ótinish jasady.
Qorǵanys mınıstrligi zardap shekken aýdandardan adamdardy qaýipsiz jerlerge jetkizýge tikushaqtar bóldi, Tótenshe jaǵdaılar mınıstrligi Baghlan provıntsııasynyń zardap shekken aýdandaryna azyq-túlik jetkizýdi bastady.
