Aýǵanstandaǵy saılaý aldyndaǵy dodada toǵyz úmitker qaldy
ÁBÝ-DABI. QazAqparat - Jeksenbi kúni Kabýlda el prezıdentine úmitkerlerdiń biri, general Abdýl Rahım Vadak óziniń saılaý dodasynan shyǵatynyn jarııalady. Sóıtip, Aýǵanstandaǵy joǵarǵy saıası laýazymǵa úmitkerler sany toǵyz adamǵa deıin qysqardy.
General Abdýl Rahım Vardak - Aýǵanstannyń burynǵy qorǵanys mınıstri jáne prezıdenttiń áskerı keńesshisi, ol ázirge qalǵan úmitkerlerdiń qaısysyn qoldaıtynyn aıtqan joq. Degenmen, birqatar aýǵandyq taldamashylar buny prezıdenttikke úmitkerler koalıtsııasyn qalyptastyrý úderisiniń jalǵastyrylyp otyrǵanyna balady.
«Bılik men úshin eshqashan da mańyzdy bolǵan emes jáne olaı bolmaıdy da. Buǵan deıin men osylaısha bes ártúrli basty laýazymdardy tastap kettim, al ázirge men aldaǵy saılaýda qaı úmitkerge qosylýymdy sheshken joqpyn», - dep málimdedi baspasóz máslıhatynda A.Vardak.
Abdýl Rahım Vardak Aýǵanstanda 5 sáýirde ótetin prezıdent saılaýynan óziniń kandıdatýrasyn alyp tastaǵan ekinshi úmitker. Keıbir aýǵan saıasatkerleri A.Vardaktyń bul qadamyn taǵy bir úmitker Kaıým Karzaıdyń osyndaı sheshimimen baılanystyrady. Ótken aıda qazirgi prezıdenttiń inisi K.Karzaı da resmı túrde óziniń naýqanyn aıaqtap, burynǵy syrtqy ister mınıstri Zalmaı Rasýldy qoldaıtynyn málimdedi.
Kabýldegi saıasattanýshy Ahmad Djoıenda Kaıým Karzaı men Abdýl Vardaktyń áreketi qazirgi bıliktiń basty favorıti Zalmaı Rasýldyń jeńisine jol ashýy tıis dep sanaıdy.
2010 jylǵy qańtarda Aýǵanstan prezıdenti Hamıd Karzaı ózi saılanǵannan keıin Zalmaı Rasýldy el parlamentine syrtqy ister mınıstri qyzmetine úmitker retinde usynǵan bolatyn, onyń kandıdatýrasy parlamenttiń tómengi palatasy músheleriniń kópshilik daýysymen qabyldandy.
Sońǵy 12 jyl Z.Rasýl Hamıd Karzaıdyń el basshylyǵyndaǵy senimdi adamdarynyń biri bolyp, onyń kóptegen mańyzdy saparlaryna erip júrdi.
