Aýǵanstandaǵy mektepte jarylys bolyp, 20-dan asa adam qaza tapty

AMMAN.QazAqparat – Aýǵanstannyń soltústigindegi Samanǵan provıntsııasynda bolǵan jarylys saldarynan 23 adam qaza taýyp, 30 adam jaraqat aldy, dep habarlaıdy QazAqparat AlJazeera-ǵa silteme jasap.

ToloNews agenttiginiń habarlaýynsha, oqıǵa provıntsııanyń ákimshilik ortalyǵy Aıbak qalasynda ornalasqan semınarııada (medresede) besin namazy kezinde bolǵan.

Samanǵan aımaqtyq aýrýhanasy dárigerleriniń aıtýynsha, aýrýhanada keminde 15 adam qaza taýyp, 27 adam jaraqat alǵan. Іshki ister mınıstrliginiń ókili Abdýl Nafı Takor Soltústik Samanǵan provıntsııasynyń astanasy Aıbaktaǵy medresede bolǵan jarylystan taǵy birneshe adam jaraqat alǵanyn aıtty.

Sońǵy aptalarda birneshe ret jarylys boldy. Olardyń sońǵysy qarasha aıynyń basynda Aýǵanstan astanasy Kabýldyń batysynda bolǵan. Ol kezde memlekettik qyzmetkerler mingen avtobýs jarylyp, eki adam qaza taýyp, altaýy jaraqat alǵan edi. Qazan aıynda el astanasyndaǵy ІІM ǵımaratynda ornalasqan meshitte bolǵan jarylystan 8 adam qaza taýyp, 20 adam jaralanǵan bolatyn.

Osy aıdyń basynda Kabýldyń batysyndaǵy bilim berý ortalyǵynda iri lańkestik shabýyl bolyp, saldarynan 50-den astam adam qaza tapty. Olardyń basym kópshiligi –stýdentter, sondaı-aq 100-ge jýyq adam jaraqat aldy.

Foto: www.aljazeera.net