Aýǵanstandaǵy esirtki saýdasy bizdiń bárimizge qater tóndirip otyr - AQSh Memlekettik hatshysynyń kómekshisi
ALMATY. Jeltoqsannyń 9-y. QazAqparat /Erlik Erjanuly/ - Ortalyqazııalyq aımaqtyq aqparattyq úılestirý ortalyǵy Aýǵanstannan bizdiń elderimizge esirtki tasqynyna tosqaýyl qoıýdaǵy áriptestiktiń mańyzdy quramdas bóligi. Ony AQSh Memlekettik hatshysynyń kómekshisi Devıd Djonson búgin Almatydaǵy Іshki ister akademııasynyń Esirtki bıznesine qarsy kúres jónindegi vedomstvoaralyq oqý ortalyǵynda bolǵan kezde aıtty,
dep habarlaıdy QazAqparat.
"AQSh syrtqy saıasatynda Aýǵanstan eń úlken basymdyqqa ıe bolyp otyrǵany eshkimdi tań qaldyrmasy anyq. Ótken aptada prezıdent Barak Obama koalıtsııanyń jumysyna kúsh qosý úshin qosymsha 30 myń sarbazdy jiberetinin jarııa etti. Aýǵanstandaǵy esirtki saýdasy bizdiń barlyǵymyzǵa úlken qater tóndirip otyr. Esirtki tasymaly tálibterge dem berip, tek Ortalyq Azııa aımaǵynda emes, odan tysqary jerlerde de quqyqtyq tártip pen qaýipsizdik normalaryn buzýda. Ol qoǵamnyń saýlyǵyna qater tóndirip, jurtty radıkaldandyrýǵa yqpal etýde", deıdi AQSh Memlekettik departamentindegi Memlekettik hatshynyń halyqaralyq esirtkimen kúres jáne zańdylyqty saqtaý jónindegi (INL) kómekshisi Devıd Djonson. Onyń aıtýynsha, AQSh Memlekettik departamentiniń bul mekemesi Ortalyq Azııa arqyly Aýǵanstanǵa esirtki qospalaryn jetkizý jáne bul elden búkil álemge daıyn esirtki tasymaldaý máselesine erekshe mán berip kele jatyr. Bul tasymal AQSh-tyń áriptes elderine keri áserin tıgizýde. Ortalyqazııalyq aımaqtyq aqparattyq úılestirý ortalyǵy esirtki tasymalynyń bizdiń qoǵamymyzǵa keltirip otyrǵan orasan zor keri áserin azaıtýǵa múmkindik beredi.
