Aýǵanstandaǵy jer silkinisinen Qazaqstan azamattary zardap shekken joq
Aýǵanstandaǵy jer silkinisinen Qazaqstan azamattary zardap shekken joq. Bul týraly Syrtqy ister mınıstrliginiń resmı ókili Aıbek Smadııarov aıtty, dep habarlaıdy Kazinform agenttigi.
«Dıplomattarymyz zardap shekken joq. Elshilik astanasynda (Aýǵanstan astanasy Kabýl qalasy) ornalasqan. Astanasynda aıtarlyqtaı terbelis bola qoımady. Zardap shekkender men qaza tapqandar arasyndaǵy Qazaqstan azamattary týraly aqparat ta kelip túspedi. Eshqandaı ótinish bolmady. Eger qandaı da bir ótinish bolsa, jedel habarlaımyz», - dedi Aıbek Smadııarov mınıstrliktegi brıfıng barysynda BAQ ókilderiniń saýalyna oraı.
Sonymen qatar ol Qazaqstan Respýblıkasynyń Syrtqy ister mınıstrligi Aýǵanstannyń batysynda kóptegen adam shyǵynyna ákep soqtyrǵan qatty jer silkinisi týraly habardy tereń kúızelispen qabyldaǵanyn atap ótti.
«Osy qıyn sátte qaza tapqandar men zardap shekkenderdiń otbasylaryna, sondaı-aq búkil aýǵan halqyna shyn júrekten kóńil aıtamyz. Jaraqat alǵan Aýǵanstannyń barlyq azamattaryna tezirek saýyǵyp ketýin tileımiz. Osyǵan baılanysty qazaqstandyq tarap aýǵan halqyna tıisti jedel kómek kórsetýge daıyn ekenin málimdeımiz», - dedi resmı ókil.
Buǵan deıin Aýǵanstandaǵy alapat jer silkinisinen 2053 adam qaza tapqanyn habarlaǵan edik. Al búgin Memleket basshysy Qasym-Jomart Toqaevtyń tapsyrmasyna sáıkes Qazaqstan Respýblıkasy Aýǵanstanǵa gýmanıtarlyq kómek kórsetetindigi belgili boldy.
