Aýǵanstandaǵy jer silkinisinen qaza tapqandar sany 2200-den asty

ASTANA.KAZINFORM — Beısenbi kúni qutqarýshylar Aýǵanstandaǵy jer silkinisinen qıraǵan úılerdiń astynan taǵy júzdegen adamnyń denesin alyp shyqty, dep habarlaıdy Kazinform. 

Sońǵy málimetter boıynsha, qaza tapqandar sany 2205 adamǵa jetken. Taǵy 3640 adam jaraqat aldy.

Bul týraly X áleýmettik jelisinde Talıban qozǵalysynyń resmı ókiliniń orynbasary Hamdýlla Fıtrat habarlady.

Onyń aıtýynsha, qutqarý jáne izdestirý jumystary jalǵasyp jatyr, ártúrli aýmaqtarda adamdarǵa arnalǵan shatyrlar tigilip, alǵashqy medıtsınalyq kómek pen qajetti zattar jetkizilip jatyr.

Aýqymdy qıraý Pákistanmen shekaralas Kýnar provıntsııasynda tirkeldi.

Aıta keteıik, 1 qyrkúıekke qaraǵan túni Aýǵanstanda kúshi 6 baldyq jer silkinisi boldy. Bul sońǵy jyldardaǵy eldegi kóp adam ólimi tirkelgen joıqyn jer silkinisi boldy.

Keıinirek 2 qyrkúıekte 5,5 balldyq ekinshi jer silkinisi qaıtalanyp, taýdan tas qulap, shalǵaı aýdandardaǵy aýyldarǵa baratyn joldar jabylǵandyqtan qutqarý jumystary qıyndady.

Buǵan deıin Aýǵanstandaǵy jer silkinisinen qaza bolǵandar sany 1411 adamǵa jetkenin habarlaǵan edik.