Aýǵanstandaǵy demalys ornynda qarýly shabýyldan keminde tórt adam qaza tapty
ASTANA. KAZINFORM — Aýǵanstannyń batysyndaǵy Gerat provıntsııasynda ornalasqan demalys aımaǵynda belgisiz qarýly adamdardyń shabýyly saldarynan keminde tórt adam qaza tapty, dep habarlaıdy BBC.
Resmı málimetterde qaza tapqandar sany ártúrli kórsetilgen. Talıbterdiń ishki ister mınıstrligi jeti adamnyń kóz jumǵanyn habarlasa, provıntsııalyq bılik tórt adamnyń qaza tapqanyn málimdedi.
Oqıǵa juma kúni Gerat provıntsııasynyń Endjıl aýdanyndaǵy Deh Mehrı aýyly mańynda bolǵan. Ádette bul demalys orny juma kúnderi adamǵa lyq tolady.
Іshki ister mınıstrliginiń ókili belgisiz qarýly adamdardyń mototsıklmen kelip, beıbit turǵyndarǵa oq jaýdyrǵanyn aıtty. Jergilikti dárigerdiń aıtýynsha, shabýyl qurbandary negizinen shııt baǵytyndaǵy hazar etnosynyń ókilderi bolǵan. Onyń sózinshe, adamdar jergilikti qasıetti orynda saýyq qurǵan.
Degenmen dáriger resmı derekten joǵary kórsetkishti atap, 12 adamnyń qaza taýyp, taǵy 12 adamnyń jaralanǵanyn jetkizdi.
Gerattaǵy talıbter úkimetiniń aqparat jáne mádenıet basqarmasynyń basshysy Ahmadýlla Mýttakı oqıǵanyń jergilikti ýaqytpen shamamen saǵat 15:00-de bolǵanyn aıtty. Onyń málimetinshe, aımaqtyq aýrýhanaǵa tórt adamnyń máıiti men 15 jaraly jetkizilgen, olardyń arasynda eki áıel bar. Keıbir zardap shekkenderdiń jaǵdaıy aýyr.
Al qaýipsizdik kúshteri kúdiktini ustaǵany habarlandy. Ázirge bul shabýyl úshin eshbir top jaýapkershilikti óz moınyna alǵan joq.
Shııtter, negizinen hazar etnıkalyq tobynyń ókilderi, Aýǵanstanda azshylyqty quraıdy jáne buǵan deıin birneshe ret qýdalaýǵa ushyraǵan.
Aıta keteıik, buǵan deıin Aýǵanstanda sý tasqynynan 77 adam kóz jumǵanyn jazdyq.
