Aýǵanstandaǵy densaýlyq saqtaý mekemeleriniń 80%-y jabylýy múmkin
ASTANA. KAZINFORM — Aýǵanstan aldaǵy aılarda negizgi medıtsınalyq mekemeleriniń 80 paıyzynan aıyrylyp qalý qaýpi bar. Bul týraly Dúnıejúzilik densaýlyq saqtaý uıymynyń (DDU) eldegi mıssııasynyń basshysy Edvın Chenıza Salvador málimdedi.

DDU málimeti boıynsha, 4 naýryzda 167 aýrýhana men emhana jabylyp, 25 provıntsııada 1,6 mıllıon adam medıtsınalyq kómeksiz qaldy. Jaǵdaı ózgermese, maýsym aıyna deıin taǵy 220 medıtsınalyq mekeme jumysyn toqtatýy múmkin.
Eń qıyn jaǵdaı eldiń soltústik, batys jáne soltústik-shyǵys aımaqtarynda, barlyq medıtsınalyq ortalyqtardyń úshten birinen astamy endi jumys istemeıdi.
— Bul jabylýlar — jaı sandar emes. Olar — qaýipsiz bosana almaıtyn analar, vaktsınatsııalanbaǵan balalar, ólimge ákeletin aýrýlardan qorǵalmaǵan búkil qoǵam. Saldary joǵalǵan ómirmen ólshenetin bolady, — dedi Salvador.
Densaýlyq saqtaý júıesindegi problemalar qarjylandyrýdy qysqartýdan buryn da bastalǵan. 2025 jyldyń qańtar jáne aqpan aılarynda ǵana Aýǵanstanda qyzylshaǵa kúdikti 16 000-nan astam jaǵdaı tirkeldi, 111 naýqas qaıtys boldy. Alaıda qyzylshaǵa qarsy vaktsınanyń birinshi dozasyn balalardyń 51%-y ǵana, al ekinshi dozasyn 37%-y ǵana alǵan.
Daǵdarys halyqaralyq kómektiń qysqarýynan jáne qarjynyń qaıta bólinýinen týyndady. Jekelegen qaıyrymdylyq kómekteri bolǵanymen, olar eldiń densaýlyq saqtaý júıesin qoldaýǵa jetkiliksiz ekeni anyq.
Eske sala keteıik, Aýǵanstanda tálipter áıelderge radıodan habar taratýǵa tyıym saldy.