Aýǵanstanda júrgen Qazaqstan qutqarýshylary úıindi astynan balanyń denesin tapty
Qazaqstan qutqarýshylary Aýǵanstannyń úsh eldi mekeninde jer silkinisinen qıraǵan úılerdi tekserip shyqty. Kazinform bul týraly QR Tótenshe jaǵdaılar mınıstrligine silteme jasap habarlaıdy.
Prezıdent Qasym-Jomart Toqaevtyń tapsyrmasymen Aýǵanstanǵa jiberilgen qazaqstandyq qutqarýshylar joıqyn zilzala saldaryn joıýǵa kómek kórsetýdi jalǵastyryp jatyr.
Naıbrofı eldi mekeninde qazaqstandyq qutqarýshylar 211 úı fragmentiniń úıindisin bólshektedi. «Bir qatarmen» ádisi boıynsha olar 487 ýchaskeni jaıaý júrip ótti. Osy eldi mekende 700 úıdiń qırandysy tekserildi.
«Tolyǵymen qıraǵan turǵyn úıdiń bireýin bólshekteý barysynda qutqarýshylar qaza bolǵan 5-6 jasar balanyń denesin taýyp, alyp shyqty.
Aýǵan tarapynyń ókilderimen birlesip, qazaqstandyqtar Naıbrofıden 10 km qashyqtyqta ornalasqan Sııahan eldi mekeninde tolyǵymen qıraǵan úılerdiń astyn tekserdi. Cholk eldi mekeninde de úıindilerdi bólshekteý jumystary júrgizildi. Zardap shekkender tabylǵan joq», - delingen mınıstrlik aqparatynda.
Málimetke súıensek, Qazaqstan qutqarýshylary jergilikti 80 turǵynǵa, onyń ishinde 11 balaǵa medıtsınalyq kómek kórsetti.
Qatty aftershok faktileriniń jıileýine jáne bólingen ýchaskedegi jumystardyń aıaqtalýyna baılanysty Qazaqstan TJM jasaǵy Gerat qalasyna barý úshin jolǵa shyqqan.
Eske salaıyq, 10 qazanda Qazaqstannyń 45 qutqarýshysy joıqyn jer silkinisiniń saldaryn joıýǵa kómek kórsetý úshin Aýǵanstanǵa attanǵan bolatyn. Alǵashqy táýlik ishinde 76 ýchaskedegi úıindi bólshektelgen bolatyn.
Sondaı-aq keshe, 11 qazan kúni Qazaqstan halqynyń atynan gýmanıtarlyq kómektiń alǵashqy legi tıelgen arnaıy ushaq Aýǵanstannyń Gerat áýejaıyna qonǵan bolatyn. Bul týraly oqıǵa ornynan Kazinform tilshisi Esimjan Naqtybaı habarlady.
7 qazan kúni Aýǵanstannyń batysyndaǵy Gerat provıntsııasynda 6,3 baldyq jer silkinisinen 2053 adam qaza taýyp, 9 myńnan astam adam jaraqat aldy.
