Aýǵanstanda jarylystan 4 adam qaza bolyp, 90-y jaraqattandy
ASTANA. QazAqparat - Dúısenbi kúni keshke Aýǵanstanda qýatty jarylys bolyp, saldarynan 4 adam qaza tapty, 90-ǵa jýyǵy zardap shekti, dep habarlaıdy QazAqparat afghanistan.ru saıtyna silteme jasap.
Jarylys Aýǵanstan astanasy Kabýldyń shyǵys bóliginde boldy. Onda kommertsııalyq emes uıymdardyń keńseleri, turǵyn úıler men sheteldik azamattar jıi baratyn demalys oryndary ornalasqan.
Eldiń Іshki ister mınıstrliginen málim etkendeı, mınalanǵan júk kóligi jarylǵan. Qýatty jarylystan 4 adam mert boldy, jaqyn mańda ornalasqan ǵımarattar jartylaı qırady. Ajal qushqandardyń úsheýi áskerı qyzmetshi, bireý - azamattyq tulǵa. Zardap shekkenderdiń deni beıbit halyq. Jaraqattanǵandar arasynda 23 bala men 12 áıel bar.
Tolo News saıtynyń jazýynsha, el prezıdenti Ashraf Ganı shabýyldy aıyptap, onyń adamgershilikke jatpaıtynyn jáne ıslamǵa qarsy baǵyttalǵanyn atap ótti. Prezıdenttik saraıdyń málimdemesinde A.Ganı tıisti organdarǵa shabýyldy jiti tergeýdi jáne zardap shekkender men qaza bolǵandardyń otbasylarynyń qajettilikterin óteýdi tapsyrǵany aıtylǵan.
