Aýǵanstanda tálibter Tájikstanǵa jaqyn Qundyz qalasyn basyp aldy
ASTANA. QazAqparat - «Talıban» radıkaldy qozǵalysynyń sodyrlary Aýǵanstannyń soltústigindegi Qundyz qalasyn tolyq jaýlap aldy, dep habarlady VVS agenttigi.
Aýǵanstan áskerıleri qalany baqylaý múmkindigin joǵaltqanyn rastady, alaıda jergilikti áýejaıdy baqylap turǵanyn aıtty.
Aýǵanstannyń qaýipsizdik kúshteri Qundyz túbinde qoldaýdy kútedi. Budan keıin olar shabýylǵa kóshýdi josparlap otyr.
Talibter Qundyzǵa 28 qyrkúıekten shabýyl jasaı bastady. Oǵan júzdegen sodyr qatysty. Keshke taman olar qalanyń jartysynan astamyn, keıin shahardy tolyq jaýlap aldy.
Qazir Qundyzdyń ortalyǵynda «Talıban» týy ilingen. Sonymen qatar, sodyrlar qalany jaýlaǵan soń qolyna túsken aýǵan bronetehnıkasynyń sýretterin ǵalamtorǵa jarııalap jatyr.
Qundyzda birneshe strategııalyq mańyzy bar joldar toǵysady, al provıntsııa Tájikstanmen shektesedi. Qala turǵyndarynyń sany 100 myń adamnan asady.
