Aýǵanstanda tabıǵı apat: joıqyn jer silkinisi 800-den asa adamnyń ómirin qıdy
ASTANA. KAZINFORM — Aýǵanstannyń shyǵysynda bolǵan alty baldyq jer silkinisinen 800-den astam adam qaza taýyp, shamamen 2800 adam túrli jaraqat alǵan, dep jazady VVS.
Bul týraly «Talıban» qozǵalysy baqylaıtyn Aýǵanstan úkimetiniń ókili habarlady.
Buǵan deıin 600-den astam adam qaza taýyp, 1500-den astamy zardap shekkeni habarlanǵan edi. Eldiń Densaýlyq saqtaý mınıstrligi sol kezde-aq qurbandar sany áli de ósýi múmkin ekenin eskertken bolatyn.
Mınıstrliktiń málimetinshe, jer silkinisiniń epıtsentri bolǵan Kýnar provıntsııasy qatty zardap shekken. Alaıda baılanys júıesiniń buzylýy men joldardyń jabyq bolýyna baılanysty naqty derekter áli anyq emes.
Qutqarýshylar tabıǵı apattan qatty zardap shekken shalǵaı aýyldarǵa jetýge tyrysyp jatyr. Bul óńirde buǵan deıin de birneshe ret jer silkinisteri men sý tasqyndary bolǵan. Reuters agenttigi bılik ókilderine silteme jasaı otyryp, keıbir aýyldarda qaza tapqandardyń sany ondaǵan adamǵa jetýi múmkin ekenin jazdy.
Máselen, BBC-diń habarlaýynsha, Kýnar provıntsııasynyń bir aýylynda keminde 20 adam qaza tapqan. Al Densaýlyq saqtaý mınıstrliginiń ókili Sharafat Zamannyń aıtýynsha, taǵy bir aýylda aldyn ala málimet boıynsha 30 adam qaza bolǵan. Úsh aýyl múlde jermen-jeksen bolǵan.
Aýyr jaralanǵandar Nangarhar áýejaıynan tikushaqpen aımaqtyq aýrýhanalarǵa jetkizilip jatyr.
Resmı málimet boıynsha, qutqarý jumystaryna áskerıler men jergilikti turǵyndar jumyldyrylǵan.
Jer silkinisi dúısenbige qaraǵan túni Aýǵanstannyń shyǵysyndaǵy Kýnar provıntsııasynda tirkeldi. AQSh Geologııalyq qyzmetiniń málimeti boıynsha, epıtsentr Djelalabad qalasynan 27 shaqyrym soltústik-shyǵysqa qaraı, 8 shaqyrym tereńdikte ornalasqan. Jer silkinisiniń qýaty 6 ball bolǵan.
Jerasty dúmpýleri Kabýlda jáne Pákistan astanasy Islamabadta da sezilgen.
Aýǵanstan bıligi halyqaralyq gýmanıtarlyq uıymdardy shalǵaı taýly óńirlerdegi qutqarý jumystaryna kómektesýge shaqyrdy. Bul aýdandarǵa kóshkin men buǵan deıingi sý tasqyndarynyń saldarynan tek áýe arqyly jetýge bolady.
— Ázirge birde-bir shet memleketten qutqarý nemese qalpyna keltirý jumystaryna kómek kórsetý týraly usynys túspegen, — dedi Aýǵanstan Syrtqy ister mınıstrliginiń ókili.
Aıta keteıik, ótken jyly eldiń batysynda bolǵan birqatar jer silkinisi saldarynan 1000-nan astam adam qaza tapqan bolatyn.