Aýǵanstanda sý tasqynynan qaza bolǵandar sany 70-ke jetti
KABÝL. QazAqparat – Aýǵanstannyń soltústigindegi Parvan provıntsııasynda nóser sýynyń tasqynynan qaza bolǵandar sany 70-ke jetti, dep habarlaıdy QazAqparat BBC News agenttigine silteme jasap.
Sý tasqyny Charıkar qalasynda sársenbi kúni tańerteń, el uıyqtap jatqanda tóngen. Qurban bolǵandardyń deni – áıelder men balalar. Kóz jumǵandardyń sany áli de artatyny kútilýde.
Parvan provıntsııasynyń gýbernatory Fazlýdın Aıar jýrnalısterge «sý tasqynynan júzdegen adam ajal qushqan bolýy múmkin» ekendigin habarlady.
Charıkardan túsip jatqan fotolarda úıindilerdi qoparyp jatqan qutqarýshylardy, laıǵa aınalǵan kóshelerdi, óz zattaryn izdep júrgen adamdardy kórýge bolady.
«Bizdiń aýdanda taǵy eki otbasy úıindiler astynda qalyp otyr. Kómek kórsetý úshin bizge kóbirek qutqarýshylar kerek», - dedi Tolo News telearnasyna qala turǵyndarynyń biri.
Aýǵanstan Prezıdenti Ashraf Ganı zardap shekkenderge shuǵyl kómek kórsetýdi tapsyrdy.
Jazda Aýǵanstannyń soltústik jáne shyǵys aýmaqtarynda jańbyr jıi jaýyp, sý tasqyny týyndaıdy. Osy aıda Nangarhar provıntsııasyndaǵy aýylda sý tasqynynan 16 adam ajal qushqan bolatyn. Onyń deni – balalar.
