Aýǵanstanda sý tasqyny saldarynan qaza tapqandar sany 150 adamǵa jetti

El bıligi taýdaǵy Parvan provıntsııasynda nóser jańbyrdan oryn alǵan sý tasqyny saldarynan 900-den astam otbasyny qaýipsiz jerge kóshirdi. Bul týraly QazAqparat agenttigi Gulf Today -ge silteme jasap habarlaıdy.

Kem degende 250 adam jaraqat aldy.

Tiri qalǵandardyń aıtýynsha, qaza bolǵandar arasynda balalar kóp. Tabıǵı apat saldarynan qaza tapqandar sany áli de ósýi múmkin.

Aýǵanstan aýdandary qurǵaqshylyqtan da, ońtústikazııalyq mýsson kezeńindegi tolassyz jańbyrdan da únemi zardap shegip otyrady.

Jergilikti turǵyn 45 jastaǵy sharýa Muhamed Qasym AFP-ǵa sý tasqyny saldarynan otbasynyń 11 múshesi qaıtys bolǵanyn aıtty. «Meniń ápkem, onyń kúıeýi, eki qyzy men olardyń balalary bir úıde uıyqtap jatqan edi», - dedi Qasym.

Parvan provıntsııasy bıliginiń aıtýynsha, sý tasqyny Charıkar qalasyn basqan, jergilikti aýrýhana jarym-jartylaı qırady, jaraqat alǵan kóptegen adam Kabýl aýrýhanalaryna aýystyryldy.

Provıntsııanyń baspasóz hatshysy Vahıda Shakhar qurbandar sanynyń sany áli de ósýi múmkin ekenin málimdedi, sebebi qutqarý komandalary qıraǵan úılerdiń astynda qalǵan adamdardy izdeý jumystaryn júrgizýde.

Kem degende segiz adam, sonyń ishinde eki bala sýǵa batyp ketkeni, 14 adam jaraqat alǵany habarlanyp otyr.

Aýǵanstan prezıdenti Ashraf Ǵanı óz málimdemesinde qaza bolǵandardyń otbasylaryna kóńil aıtyp, Parvan jáne basqa provıntsııalarǵa kómek jetkizýdi buıyrǵan.

Parvanda 2000-nan astam úı qırady, 1000-nan astam adam qaýipsiz jerge kóshirilgen.

Sondaı-aq, Nangarhar, Pandjshır, Vardak, Loghar, Paktıka jáne Kapısa provıntsııalarynda da aıaqasty oryn alǵan sý tasqyny týraly habarlandy.

Aýǵanstanda nóser jaýyn men aıaqasty sý tasqyny saldarynan jyl saıyn ondaǵan adam qaza tabady.

Buǵan deıin osy aıda eldiń shyǵysyndaǵy Nangahar provıntsııasynda oryn alǵan sý tasqyny saldarynan 16 adam, sonyń ishinde 15 bala qaza tapty. Ondaǵan úı qırap qaldy.