Aýǵanstanda sottalǵandar men boryshkerlerge tólqujat berýge tyıym salyndy

ASTANA. KAZINFORM — Aýǵanstanda tólqujat ala almaıtyndardyń tizimi keńeıtildi, dep habarlaıdy Khaama Press. 

Basylymnyń málimetinshe, tólqujat bólimine jańa erejeler engizgen. Olardyń aıtýynsha, sottalǵandarǵa, qamqorshysy joq balalarǵa, sondaı-aq ótelmegen qaryzy nemese basqa da mindetteri bar tulǵalarǵa shetelge shyǵýǵa jáne tólqujat alýǵa tyıym salynady.

— Bıometrııalyq júıeler men derekter bazasy arqyly shetelge shyǵýǵa tyıym salynǵan tulǵalar retinde anyqtalǵan adamdardyń tólqujatyn berýden avtomatty túrde bas tartylady, — delingen habarlamada.

Basylymnyń jazýynsha, buǵan deıin barlyq azamattar tólqujat alýǵa quqyly bolǵan, al shekteýler tek jekelegen qylmystyq ister boıynsha ǵana qoldanylǵan.

Aýǵanstanda jeke basyn kýálandyratyn qujat «tazkıra» dep atalady jáne ony halyqtyń basym bóligi paıdalanady. Shetelge shyǵý úshin tólqujat qajet.

Eske sala keteıik, Irannan shyǵarylǵan 70-ten astam aýǵanstandyq bosqyn jol apatynan qaza tapty.