Aýǵanstanda sońǵy 45 jylda alǵash ret ulttyq halyq sanaǵy júrgiziledi

ASTANA. KAZINFORM — Aýǵanstan bıligi 1979 jyldan beri alǵash ret ulttyq halyq sanaǵy naýqanyn ótkizýge nıetti jáne bul másele Aýǵanstan mınıstrler kabınetiniń otyrysynda basty másele boldy, dep habarlaıdy RIA Novostı. 

Dúısenbi kúni premer-mınıstr Muhammed Hasan Ahýndtyń tóraǵalyǵymen ótken otyrysta jalpyulttyq sanaqty ótkizýdiń usynylyp otyrǵan negizderi talqylandy.

— Mınıstrler kabıneti Ulttyq statıstıka jáne aqparat agenttigine (NSIA) halyq sanaǵy josparynyń jobasyn muqııat zerdeleýdi jáne úkimettiń kelesi otyrysyna qorytyndy esepti usynýdy tapsyrdy, — delingen habarlamada.

NSIA dırektory Abdýl Qadyrǵa usynysty baǵalaý jáne sanaq jospary týraly jan-jaqty esep daıyndaý úshin arnaıy keńes shaqyrý tapsyryldy.

Aýǵanstan boıynsha naqty demografııalyq derekter, sonyń ishinde ártúrli etnıkalyq jáne áleýmettik toptar jaıly anyq málimetter joq. NSIA málimetteri boıynsha, 2023-24 jyldary Aýǵanstan halqynyń sany 35,7 mıllıonǵa jetken bolýy múmkin. Alaıda, BUU-nyń keıbir ınstıtýtynyń baǵalaýy boıynsha, 41,4 mıllıon adamǵa jetýi múmkin.

Aýǵanstandaǵy sońǵy ulttyq halyq sanaǵy 1979 jyly júrgizildi jáne qaýipsizdik máselesine baılanysty el aýdandarynyń 67%-yn ǵana qamtydy, ol elge keńes áskerleriniń shekteýli kontıngentiniń kirýimen úzildi.

Eske sala keteıik, Aýǵanstandaǵy densaýlyq saqtaý mekemeleriniń 80%-y jabylýy múmkin.