Aýǵanstanda sheneýnikterge sýretke túsýge jáne suhbat berýge tyıym salyndy

ASTANA. KAZINFORM – Aýǵanstannyń shyǵysyndaǵy Nangarhar provıntsııasynyń bıligi jergilikti sheneýnikterge BAQ ókilderine sýretke túsýge jáne beıne suhbat berýge resmı túrde tyıym saldy. Bul týraly Aýǵanstan jýrnalıstıka ortalyǵy (AFJC) habarlady, dep jazady RIA Novostı.

Ortalyqtyń málimetinshe, Aýǵanstandaǵy «Talıban» ýaqytsha úkimetiniń BAQ bostandyǵyna qarsy áreketteri artyp keledi.

– Bul tyıym óte alańdatady, óıtkeni Nangarhar mundaı shekteýlerdi engizgen besinshi provıntsııa, – delingen habarlamada.

Qaýipsizdik maqsatynda aty-jónin jarııalaǵysy kelmegen Nangarhardaǵy BAQ basshysy bul buıryqty jergilikti sheneýnikterge oblys ákiminiń orynbasary Azızýllo Mustafa bergenin habarlady.

Provıntsııanyń aqparat jáne mádenıet departamentiniń dırektory Kýreshı Badlýn 12 qarashada resmı tulǵalar men jergilikti BAQ jetekshilerine buıryq týraly WhatsApp arqyly habarlaǵan. Sondaı-aq, Nangarhar gýbernatorynyń orynbasary provıntsııadaǵy barlyq sheneýnikterge endi jańalyqtardy tek jazbasha túrde buqaralyq aqparat quraldaryna berýdi buıyrdy. BAQ-ta tek memlekettik ǵımarattardy, jarnamalar men logotıpterdi paıdalanýǵa ruqsat etilgen. Sonymen qatar, jergilikti sheneýniktermen barlyq suhbattar budan bylaı tek aýdıo formatta bolýy kerektigi aıtyldy.

Aıta keteıik, buǵan deıin Aýǵanstanda áıelderdiń bir-birimen sóılesýine tyıym salynǵan edi.