Aýǵanstanda shahta opyrylyp, 30 adam opat boldy
ASTANA. QazAqparat - Aýǵanstannyń soltústiginde altyn óndiretin shahta opyrylyp, kemi 30 adam opat boldy, dep habarlaıdy TASS Sky News Arabia telearnasyna silteme jasap.
Qaıǵyly oqıǵa Badahshan provıntsııasynyń Kohıstan aýdanynda boldy. Jerastynan 15 adamdy alyp shyǵý múmkin boldy. Olardyń kóbi jaraqat alǵan, jaǵdaılary aýyr.
Pajhwok agenttiginiń jergilikti bılik ókilderine silteme jasap taratqan málimetine saı, qurban bolǵandar - zańsyz túrde altyn qazýmen aınalysqan jergilikti turǵyndar.
Badahshanda úshinshi kún qatarynan tolassyz qar jaýyp tur. Sonyń kesirinen kóptegen avtojoldar jabylǵan.
