Aýǵanstanda prezıdenttik saılaýdyń ekinshi týryndaǵy daýystardy qaıta sanaý bastaldy
ASTANA. QazAqparat - Aýǵanstanda prezıdenttik saılaýdyń ekinshi týryndaǵy daýystardy qaıta sanaý bastaldy. Táýelsiz saılaý komıssııasy (TSK) 8,1 mln. adamnyń daýysyn tekseretin bolady.
Bul sharany ótkizý úshin árqaısysy 2-3 adamnan quralǵan júzge jýyq top jasaqtaldy. Olar óz kezeginde saılaý jáshikteri men bıýlletenderin, plombalardy, sondaı-aq hattamalardy toltyrýdyń durystyǵyn zerttep shyǵady.
«Jergilikti jáne halyqaralyq baıqaýshylar osy úderisti baıqaý múmkindigin aldy. Bul jumystar úsh aptaǵa jýyq ýaqyt alady», - deıdi Táýelsiz saılaý komıssııasynyń ókili Nýr Mohammad Nýr.
TSK qyzmetkerleri eki aýysymmmen jumys isteıdi, al bıýlleten salynǵan saılaý jáshikterin tasymaldaýdy NATO kúshteri júzege asyrady, dep jazady ITAR-TASS.
TSK-nyń aldyn ala málimetteri boıynsha Aýǵanstanda prezıdenttik saılaýdyń ekinshi kezeńinde 56,44 paıyz daýyspen Ashraf Ganı Ahmadzaı alda tur. Onyń qarsylasy Abdýlla Abdýlla saılaýshylardyń 43,56 paıyz daýysyn jınady. Abdýlla bul qorytyndymen kelispeıtindigin, ıaǵnı onda burmalaý faktileri oryn alǵanyn aıtyp, narazylyq bildirdi. Osydan keıin elde kúrdeli saıası daǵdarys oryn aldy.
Daýystardy qaıta sanaý máselesi ótken aptada AQSh Memlekettik hatshysy Djon Kerrıdiń Kabýlǵa saparynan keıin ózekti boldy. Ol qos kandıdatpen de kelissózder júrgizip, Memleket basshysy laýazymynan ketip bara jatqan Hamıd Karzaımen kezdesti.
