Aýǵanstanda Pákistannyń áýe shabýylynan úsh adam qaza tapty
ASTANA. KAZINFORM - Aýǵanstannyń shyǵys provıntsııalarynda Pákistannyń áýe shabýylynan kem degende úsh beıbit turǵyn qaza taýyp, taǵy tórteýi jaralandy, dep habarlaıdy Anadolu.
Anadoly silteme jasaǵan Aýǵanstannyń Pajhwok agenttiginiń habarlaýynsha, Kýnar jáne Paktıka provıntsııalaryna soqqy jasalǵan. Aýǵanstan ákimshiliginiń resmı ókili Zabıhýlla Mýdjahıd shabýyl saldarynan turǵyn úıler men kommertsııalyq nysandar da zaqymdalǵanyn habarlady.
Aýǵan tarapy áýe shabýyldaryn aıyptap, jaýap berýge daıyn ekenin málimdedi.
Pákistan SІM óz kezeginde Aýǵanstan shekarasynda sodyrlardyń lagerleri men jasyrynǵan jerlerine «núktelik jáne tańdamaly» soqqy jasalǵanyn aıtty. Islamabadtyń pikirinshe, úsh nysana, sonyń ishinde jankeshtilerdi daıarlaý ortalyǵy jáne 28 sodyrdyń kózi joıyldy.
Pákistan tarapy sonymen qatar beıbit turǵyndar men ınfraqurylymǵa zııan keltirmeý úshin sharalar qabyldaǵanyn aıtady.
Buǵan deıin Aýǵanstan Pákistandy Kabýldaǵy esirtkige táýeldilerdi ońaltý aýrýhanasyna jasalǵan áýe shabýylynda kem degende 400 adamnyń qazasyna sebep boldy dep aıyptaǵanyn jazǵan edik.
Pákistannyń qaýipsizdik kúshteri 28 maýsymda Aýǵanstanmen shekaralas Haıber-Pahtýnhva provıntsııasynda qurlyqtaǵy arnaıy operatsııa júrgizip, 29 sodyrdyń kózin joıdy.
