Aýǵanstanda NATO kúshteriniń áýe shabýyly saldarynan 21 beıbit turǵyn qaza boldy, olardyń ishinde áıelder men balalar bar
ASTANA. Aqpannyń 22-si. QazAqparat - Naqtylanǵan málimetter boıynsha, Aýǵanstannyń ońtústigindegi Ýrýzgan provıntsııasynda NATO áýe kúshteriniń shabýyly saldarynan 21 beıbit turǵyn opat bolyp, taǵy 11 adam jaralanǵan.
Qaza bolǵandardyń ishinde áıelder men balalar bar, dep habarlady eldiń Іshki ister mınıstrliginiń ókili. Onyń aıtýynsha, shabýylǵa ushyraǵan avtobýsta barlyǵy 42 adam bolǵan, olardyń barlyǵy - beıbit turǵyndar, dep habarlaıdy ITAR-TASS agenttigi.
Koalıtsııa kúshteriniń qolbasshylyǵy, keshe tálibter bolýy yqtımal dep paıymdalǵan avtokolonnaǵa shabýyl jasalǵanyn qýattady. Mashınada áıelder men balalardyń bolǵandyǵy keıin anyqtalǵan.
Degenmen, NATO shabýyl saldarynan qansha aýǵan azamatynyń qurban bolǵany týraly málimet keltirgen joq.
Aýǵan úkimeti men NATO qolbasshylyǵy oqıǵanyń mán-jaıyn tekserýde. Bul oqıǵanyń 15 myńdaı amerıkandyq, brıtandyq jáne aýǵandyq áskerılerdiń qatysýymen kórshi Gılmend provıntsııasynda júrgizilip jatqan tálibterge qarsy operatsııaǵa qatysy joq, deıdi olar.
