Aýǵanstanda Máskeýge bet alǵan úndi ushaǵy apatqa ushyrady

ASTANA. KAZINFORM - Ótken túnde Aýǵanstanda qaıǵyly oqıǵa boldy. Máskeýge bet alǵan úndi kompanııasynyń ushaǵy Aýǵanstannyń soltústik-shyǵysynda apatqa ushyrady. Bul týraly jergilikti aqparat kózderine silteme jasap Aamaj News agenttigi habarlady, dep jazdy euronews.

Aqparatqa sáıkes, ushaq Badahshan provıntsııasynda tehnıkalyq aqaýǵa baılanysty qulaǵan.

«Talıban» qozǵalysy ókilderiniń málimdeýinshe, oqıǵanyń mán-jaıyn anyqtaý úshin aımaqqa arnaıy top jiberilgen.

Rosavıatsııanyń habarlaýynsha, Aýǵanstanda radardan joǵalyp ketken ushaq Athletic Group kompanııasyna tıesili, onyń bortynda alty adam bolǵan. Ushaq Tashkent arqyly Máskeýge bet alǵan. Rosavıatsııa Aýǵanstan men Tájikstannyń avıatsııalyq bıligimen baılanysta.