Aýǵanstanda Kosh-Tepa kanalynyń iske qosylýy Qazaqstanǵa qalaı áser etedi

ASTANA. KAZINFORM – Aýǵanstanda Kosh-Tepa kanalynyń salynýy Syrdarııa arqyly Qazaqstanǵa keletin sý kóleminiń azaıýyna sebep bolýy múmkin. Bul týraly Sý resýrstary jáne ırrıgatsııa vıtse-mınıstri Aslan Abdraımov málim etti.

– Aldaǵy ýaqytta sýdyń kúrt aýytqýyn kútpeımiz, – dedi ol.

– Biraq bolashaqta Syrdarııanyń sýy azaıýy bmúmkin. Bul bizdiń kóp jyldan qıyn jaǵdaıdaǵy Aralǵa áser etedi, - dedi Aslan Abdraımov elordada ótken «Sý qaýipsizdigi jáne transshekaralyq sý paıdalaný: syn-qaterler men sheshimder» atty halyqaralyq konferentsııa barysynda.

Vıtse-mınıstrdiń aıtýynsha, Qazaqstan men Aýǵanstan arasynda tikeleı shekara bolmaǵanymen, jańa kanaldyń áseri báribir seziledi.

– Biz Aýǵanstanmen shekaralas emespiz, biraq olardyń alatyn sý kólemi bolashaqta jalpy jaǵdaıǵa áser etedi. Ámýdarııanyń 30%-ǵa deıingi sýy Aýǵanstanǵa ketýi múmkin, - dedi.

Aýǵanstannyń Kosh-Tepa kanaly arqyly sýdyń qaıta bólinýi máselesine qatysty «Baıtaq» partııasynyń tóraǵasy Azamathan Ámirtaev te ún qatty.

– Biz syn aıtqymyz kelmeıdi. Búgin biz qazaqstandyq jáne halyqaralyq ǵalymdardy shaqyrdyq. Olar kanaldyń tıimdiligin arttyryp, sý ysyrabyn azaıtý joldaryn usynyp otyr. Biz onymen birlesip jumys istegimiz keledi. Bul – ortaq másele, – dedi A.Ámirtaev.

Partııa tóraǵasynyń aıtýynsha, Ámýdarııanyń sý resýrsynyń shamamen 25-30%-y bolashaqta Aýǵanstannyń jańa kanalyna baǵyttalatyn bolady.

– Demek, Ózbekstan men Túrikmenstanǵa sý az túsedi. Tıisinshe, Ózbekstan Syrdarııanyń sýyn kóbirek paıdalanýy múmkin. Bul Qazaqstanǵa keletin sýdyń kólemin azaıtady. Tipti Ózbekstan tarapynan keletin sý 30-40%-ǵa deıin qysqarýy múmkin. Munda tek birlesken jumys qajet. Iá, bul – úlken másele, ony sheshý kerek, – dedi Azamathan Ámirtaev.

Eske salaıyq, Aýǵanstannyń jańa kanaly Ortalyq Azııany sý tapshylyǵyna ushyratýy múmkin be degen taqyrypty Kazinform tilshisi tarqatqan edi.