Aýǵanstanda Keńes áskeri bolǵan kezde ahýal qazirgiden áldeqaıda turaqty boldy - aýǵan sardary
ALMATY. 19 qyrkúıek. QazAqparat /Erlik Erjanuly/ - Bul fılmdeginiń bári ras. Ony Aýǵanstannyń general-maıory Doranı Basır Ahmad Amır Mohamad keshe Almatyda "A"-ǵa oralý" dep atalatyn 3D pishinde túsirilgen qazaqstandyq alǵashqy kórkem fılmniń aýǵandyq ardagerlerge arnalǵan áleýmettik kórsetilimi kezinde aıtty.
"Bul fılmde kim-kimmen jáne ne úshin soǵysyp júrgeni naqty kórsetilgen. Buǵan deıin maǵan osy suraqtar Qazaqstanda jıi qoıylatyn. Munda oǵan tolyq jaýap beriledi", - deıdi aýǵan sardary. Doranı Basır Ahmad Amır Mohamadtyń aıtýynsha, Keńes armııasy Aýǵanstanda soǵysqan kezde halyqpen qoıan-qoltyq jumys istedi. Jaýyngerler dorbasyndaǵy tamaǵyn balalarmen bólisti. Olardyń beıbit halyqqa oq atqan birde-bir jaǵdaıy bolǵan joq. Búkil álem Keńes armııasyna qarsy soǵyssa da beıbit ómir boldy. Qazir onda ahýal múlde basqa. Bitimgerlik kúshteri halyqtyń ózine belgili bir ara-qashyqtyqtan artyq jaqyndaýyna shekteý qoıǵan. Sheni tómen sardarlardyń joǵarydan túsetin buıryqqa ǵana baǵynyp, óz betimen eshqandaı sheshim qabyldaýǵa quqy joq. Sondyqtan ásker men beıbit turǵyndar arasynda túsinýbeýshilik pen kıkiljiń jıi oryn alyp otyrady.
