Aýǵanstanda qazaqstandyq astyqty qolmen túsiredi

ASTANA. QazAqparat - Búginde Aýǵanstan sııaqty elderde astyqty túsirýge arnalǵan ınfraqurylym joq. Sonyń saldarynan qazaqstandyq vagondar uzaq turyp qalady, dep xabarlaıdy QazAqparat tilshisi.

"Qazaqstan temir joly" ulttyq kompanııasynyń prezıdenti Qanat Alpysbaevtyń aıtýynsha, búginde astyqty tasymaldaýǵa arnalǵan 6 000 vagon bar. Budan bólek, taǵy 2 000 vagondy tartýǵa múmkindik bar. Bunyń barlyǵy otandyq astyqty tasymaldaýǵa jetkilikti. Alaıda kóp jaǵdaıda vagondar kórshi elderde turyp qalady. Sebebi ol jaqta qajetti ınfraqurylym joq.

"Máselen, qazirgi kezde Aýǵanstan qazaqstandyq astyqty kóp alady. Biraq ol jaqta vagondardy bosatý boıynsha qarapaıym texnıkalyq múmkindikter joq. Aýǵanstanda ondaı jumysty kóp jaǵdaıda qolmen isteıdi. Sol sebepti aýǵan jerinde astyq pen undy túsirý boıynsha arnaıy termınaldardy salý qajet. Osy máseleni sheshýimiz kerek", - deıdi Q.Alpysbaev.

Onyń sózine qaraǵanda, aldaǵy ýaqytta qazaqstandyq astyqty konteınermen tasymaldaý sharalaryna basymdyq beriletin bolady. Ótken jyly osy jolmen Túrkııa, Vetnam men Qytaıǵa astyq jetkizildi. Osynyń arqasynda eksport geografııasyn keńeıtýge bolady. Osyǵan baılanysty "Qazaqstan temir joly" ulttyq kompanııasy júkterdi konteınerızatsııalaýǵa arnalǵan strategııany ázirlep jatyr.

Aıta keteıik, búgin QR Investıtsııalar jáne damý mınıstrliginiń keńeıtilgen alqa májilisi ótti. Sol jerde mınıstr Jeńis Qasymbek ákimderge ınfraqurylymǵa tartýǵa qatysty qujattardy tezdetip berýge keńes berdi. Áıtpese, jer ýchaskelerin jasaqtaýǵa arnalǵan bıýdjet qarjysy berilmeı qalady. Al vıtse-mınıstr Qaıyrbek Óskenbaev ıpotekany 8 protsentke deıin tómendetýge qatysty josparmen bólisti.