Aýǵanstanda qaza bolǵan qazaqstandyq óz Otanynda jerlendi
ASTANA. QazAqparat - Aýǵanstan astanasynda kóz jumǵan Erlan Jampeıisov Otanyna jetkizilip, jer qoınyna tapsyryldy, dep habarlaıdy «QazAqparat» HAA tilshisi SІM baspasóz qyzmetiniń jetekshisi Ánýar Jaınaqovqa silteme jasap.
Onyń aıtýynsha, marqumnyń denesi jumadan senbige qaraǵan túni 27 qańtarda jetkizilip, sol kúni jerlengen.
Á.Jaınaqov sársenbi kúni tasymaldaýǵa daıyn bolǵan máıittiń jolda nege kidirgenin de túsindirdi. Týystary solaı bolsyn dep suraǵan, sebebi olar jekemenshik ushaqpen jetkizý jolyn tapqan. Artynan anyqtalǵandaı, marqumnyń týystary alaıaqtarǵa aldanyp qalǵan.
Osyǵan deıin habarlanǵandaı, Astana qalasynyń turǵyny Erlan Jampeıisov 1978 jyly dúnıege kelgen. Ol Aýǵanstanda iskerlik maqsatpen qyzmette júrgen bolatyn.
Esterińizge sala ketsek, 21 qańtar kúni tańerteń 1978 jyly týǵan Qazaqstan azamaty sodyrlardyń Kabýldaǵy Intercontinental qonaqúıine shabýyly saldarynan ajal qushty.
Ol Astana qalasynyń turǵyny bolǵan. Aýǵanstanǵa telekommýnıkatsııa salasynda jumys atqaratyn aýǵan kompanııalarynyń biriniń shaqyrýymen issaparmen barǵan.
