Aýǵanstanda qalyń qar men nóser saldarynan 61 adam kóz jumdy

ASTANA. KAZINFORM — Aýǵanstan aýmaǵynda sársenbi men beısenbi kúnderi bolǵan qalyń qar men nóser jańbyr saldarynan keminde 61 adam qaza taýyp, taǵy 110 adam túrli jaraqat aldy, dep habarlaıdy Sınhýa.

Bul týraly senbi kúni eldiń Tabıǵı apattardyń saldarymen kúres jónindegi ulttyq basqarmasy málimdedi.

Vedomstvo dereginshe, qolaısyz aýa raıy 458 turǵyn úıdiń tolyq nemese ishinara qıraýyna ákep soqqan.

Basqarma ókilderi keltirilgen derekterdiń aldyn ala ekenin, keıbir óńirlerde jaǵdaıdy baǵalaý jumystary áli jalǵasyp jatqanyn, sondyqtan kórsetkishterdiń ózgerýi múmkin ekenin atap ótti.

Sońǵy úsh kúnde Aýǵanstannyń kóptegen aımaǵynda aıaz kúsheıip, qalyń qar jaýǵan. Sonyń saldarynan birneshe mańyzdy avtojol, sonyń ishinde Kabýldy birqatar provıntsııalarmen baılanystyratyn joldar jabyldy.

Budan buryn byltyr qarasha aıynda joıqyn jer silkinisinen keıin Qazaqstan Aýǵan halqyna gýmanıtarlyq mıssııa jibergen edi. Mıssııa quramynda 13 dáriger bardy (hırýrgter, neırohırýrgter, travmatologtar jáne t. b.). Sonymen qatar 18 tonna dári-dármek, medıtsınalyq qural-jabdyqtar, shatyrlar jáne alǵashqy qajettiliktegi ózge de zattar túrinde gýmanıtarlyq kómek kórsetildi.