Aýǵanstanda eldiń jańa prezıdentin ulyqtaý saltanaty ótedi
ASTANA. QazAqparat - Aýǵanstannyń jańa prezıdenti Ashraf Ganı Ahmadzaı 29 qyrkúıekte ant qabyldap, óziniń mindetterin atqarýǵa resmı túrde kirisedi. Saltanatty rásim Kabýlde Islam respýblıkasy basshysynyń saraıynda ótedi, dep habarlady ITAR-TASS.
Aýǵanstanda prezıdenttiń ulyqtaý saltanatyna oraı resmı demalys kúni bolyp jarııalandy. Astanada jáne prezıdent saraıynda sońǵy ázirlikter júrgizilýde. Qala kósheleri tártipke keltirilip, aýǵan ulttyq jalaýlarymen, prezıdenttikten ketetin Hamıd Karzaıdyń jáne eldiń jańa basshylary - Islam respýblıkasynyń basshysy Ashraf Ganı Ahmadzaıdyń jáne premer-mınıstr Abdýlla Abdýllanyń portretterimen bezendirilgen.
Kabýlda buryn-sońdy bolmaǵan qaýipsizdik sharalary qolǵa alyndy. Aýǵan BAQ-tary jańa tártipti «temir shymyldyq» dep jarııalap úlgirdi, polıtsııa torýyly kúsheıtildi jáne armııa qalaǵa barlyq kireberisterdi, astanalyq basty aýdandardy japty, kúsh-qurylym qyzmetteri barlyq avtokólikterdi egjeı-tegjeıli tekserýde, jeke qujattardy jappaı tekserý júprp jatyr.
Shara baǵdarlamasy boıynsha ulyqtaý rásimi aıaqtalǵan boıda, Ashraf Ganı Ahmadzaı el prezıdenti retinde Premer-mınıstr Abdýlladan jáne eki vıtse-prezıdent - Abdýl Rashıd Dýstým men Mohammad Sarvar Daneshten ant qabyldaıdy.
«Biz kóptegen sheteldik qonaqtardy, aýǵan saıası, qoǵamdyq jáne dinı qaıratkerlerin kútýdemiz», - dep málim etti Aýǵanstan úkimeti hatshylyǵynyń ókili Javad Najı. Aýǵan bıligi qaýipsizdik talaptaryna baılanysty qatysýshylardyń naqty sanyn jáne quramyn jarııalamaı otyr. Degenmen baspasózdiń habarlaýynsha, ulyqtaýǵa 1,6 myń adam qatyspaq. Qonaqtar arasynda - 200 sheteldik memleketter men uıymdar (Shanhaı yntymaqtastyq uıymynan da) ókilderi bar.
