Aýǵanstanda bolǵan jol apatynan toǵyz adam qaza taýyp, 35 adam jaraqat aldy
ASTANA. KAZINFORM — Batys Aýǵanstandaǵy Badgıs provıntsııasynda jeksenbi kúni jolaýshylar avtobýsy júrgizýshiniń abaısyzdyǵy saldarynan aýdarylyp, keminde toǵyz adam qaza taýyp, taǵy 35 adam jaraqat aldy. Bul týraly jergilikti polıtsııa habarlady, dep jazdy Sınhýa egenttigi.
Oqıǵa Sabzak aýdanynda, provıntsııa astanasy Qalaıı-Naý men batystaǵy Gerat provıntsııasyn baılanystyratyn avtojol boıynda bolǵanyn Badgıs provıntsııasynyń polıtsııa ókili Sadıkýlla Sadeki málimdedi.
Polıtsııa ókiliniń dereginshe, toǵyz jolaýshy, sonyń ishinde áıelder men balalar oqıǵa ornynda qaza tapqan. Jergilikti polıtsııa men turǵyndar 35 jaralanǵan adamdy jaqyn mańdaǵy medıtsınalyq mekemelerge jetkizip, kómek kórsetken.
Kólikti saýatsyz júrgizý, kólik qozǵalysy kóp joldarda jáne eski joldardaǵy jol belgileriniń bolmaýy Aýǵanstandaǵy negizgi ólim sebepteriniń biri bolyp otyr.
Eske sala ketsek, Pákistanda jol apatynan keminde 11 adam qaza taýyp, taǵy 10 adam jaraqat alǵanyn jazdyq.
Al 19 aqpan kúni Abaı oblysynda jol apatynan 4 adam mert boldy.